မြစ်ကြီးနား ဂျော်မဆပ် စစ်ရှောင်စခန်းအတွင်း ဖွင့်လှစ်ထားသော ကလေးမူကြိုကျောင်းတွင် တာဝန်ထမ်းဆောင်နေသည့် ဆရာမ ၄ ဦးကို လစာပေးရန် စစ်ရှောင်မိသားစုများ ဘက်မှ အခက်ကြုံတွေ့နေရကြောင်း သိရပါသည်။
ဆရာမ ၄ ဦး တာဝန်ထမ်းဆောင်နေသည်မှာ ၃လခန့်ရှိလာပြီ ဖြစ်သော်လည်း လုပ်အား လစာအဖြစ် မပေးနိုင်သေးကြောင်း စခန်းတာဝန်ခံ ဒေါ်ဘောမ်မျှော် က ယခုလို ပြောဆိုထား ပါသည်။
“အခုနောက်ပိုင်း ကူညီရေးအဖွဲ့တွေကလည်း မလာတော့ဘူး။ လက်ရှိ မူကြိုဆရာမအဖြစ် တာဝန်ထမ်း ဆောင်နေတာက ၄ယောက်ရှိတယ်။ သူတို့ကို လုပ်ခ လစာက မပေးနိုင်သေးဘူး။ ဘာကြောင့်လဲဆိုတော့ စစ်ရှောင်တစ်ဦး တစ်လကို အများဆုံး ၁၅၀၀၀ခွဲ လောက်ပဲရတယ်။ အဲထဲမှာ တစ်ချို့က စားစရာမရှိတော့ ဆန်ဝယ်လိုက်။ လိုအပ်တဲ့နေရာမှာ သုံးလိုက်တာက ပိုများနေတယ်။ မူကြိုဆရာမတွေကို များသည်ဖြစ်စေ၊ နည်းသည်ဖြစ်စေ လစာအဖြစ်ပေးဖို့က အခက်ခဲနေတာပေါ့”ဟု ပြောဆိုသည်။
၎င်းမူကြိုကျောင်းကို ယခုနှစ် လဆန်းပိုင်းက ကချင်နှစ်ခြင်းခရစ်ယာန်အဖွဲ့ချုပ် (KBC) က ဆောက်လုပ်ပေးခဲ့ခြင်း ဖြစ်ပြီး လက်ရှိတွင် စစ်ရှောင်စခန်းမှ မူကြိုကလေး ၃၆ ဦးကို ဆရာမ ၄ ဦးက တာဝန်ယူ ကြည့်ရှု့ပေးနေတာလည်း ဖြစ်ပါသည်။
ဆရာမ ၄ဦးကို မဖြစ်မနေ ကူညီထောက်ပံ့ရမည်ဖြစ်သောကြောင့် ကချင်နှစ်ခြင်းခရစ်ယာန်အဖွဲ့ချုပ် KBC သို့ အသနားခံ အကူညီ တောင်းခံသွားရမည်ဖြစ်ကြောင်း ဒေါ်ဘော်မျှော်က ဆက်လက်ပြောဆိုခဲ့ပါသည်။
ဂျော်မဆပ်စစ်ရှောင်စခန်းသည် မြစ်ကြီးနားမြို့ နောင်နန်းကျေးရွာအုပ်စု မှော်တောင်းကျေးရွာတွင် တည်ရှိပြီး အောင်လောဒ့်ပြည်သူများ ခိုလှုံနေသော စခန်းဖြစ်ပါသည်။
