ငြိမ်းစုစီပုဒ်မ ၁၉ ဖြင့်တရားစွဲခံရသော ကချင်လူငယ် ၂ ဦးအမှု မဆိုင်းနူးပန်ကို ထပ်မံစစ်ဆေး
ကချင်စစ်ဘေး ၈ နှစ်ပြည့် လမ်းဘေး တေးသရုပ်ဖော်ပြမှုကြောင့် တရားစွဲဆိုထားခံရသော လူငယ် ၂ ဦးအမှု မဆိုင်းနူးပန်ကို ယနေ့ ရုံးချိန်းတွင် စစ်ဆေးခဲ့ပါသည်။
တရားလိုဘက် သက်သေအားလုံးနှင့် တရားစွဲခံရသူများဘက် ကိုပေါလုကို လွန်ခဲ့သည့် ဇူလိုင် ၁၈ ရုံးချိန်းအထိ စစ်ဆေးခဲ့ပြီးနောက် ယနေ့တွင် တရားစွဲခံရသူတစ်ဦး မဆိုင်းနူးပန်ကို မြစ်ကြီးနားမြို့နယ် တရားရုံးမှ စစ်ဆေးခဲ့ခြင်း ဖြစ်ပါသည်။
“ကျမတို့က အကြောင်းကြားခဲ့တယ်။ တကယ်တမ်းလည်း တရားလိုဘက်နဲ့ ဇွန်လ ၆ရက်နေ့ တရားဝင်ဆွေးနွေးခဲ့တယ်။ ပြီးမှ ရဲစခန်းကိုအကြောင်းကြား စကားပြောခဲ့တယ်။ သူတို့ဘက်က ခွင့်ပြုမိန့်တင်စရာမလိုဘူး။ ငြိမ်းစုစီ တင်စရာမလိုဘူး။ ပွဲမိန့်ဘဲတင်ပါ။ ဆိုပြီးပြောခဲ့တယ်။ အဲ့ကြောင့် မတင်ခဲ့ဘူး။ ပွဲမိန့်နဲ့သာ သွားခဲ့တယ်။ အခုက ငြိမ်းစုစီ နဲ့စွဲတယ်။ ဒါ့ကြောင့် ကျမတို့မှာ အပြစ်မရှိဘူး”ဟု ထွက်ဆိုခဲ့ကြောင်း မဆိုင်းနူးပန် ပြောဆိုခဲ့သည်။
လမ်းဘေးတေးသရုပ်ဖော်ပြခဲ့သည်မှာ တစ်စုံတစ်ယောက်ကို နစ်နာအောင် ပြုလုပ်ခြင်းမဟုတ်သလို လက်ရှိ ငြိမ်းချမ်းရေးကို တွန်းအားပေးခြင်းသာဖြစ်ပြီး စစ်ရှောင်ပြည်သူများ ၈ နှစ်အတွင်း ကြုံတွေ့ခဲ့သော အခက်အခဲများကိုလည်း မြန်မာတစ်ပြည်လုံး သိအောင် လုပ်ဆောင်ခဲ့ခြင်းသာ ဖြစ်သည်ဟု ဆက်လက်ပြောဆိုခဲ့ပါသည်။
လာမည့် သြဂုတ်လ ၁ရက်နေ့တွင် ထပ်မံရုံးချိန်းထားပြီး တရားစွဲခံရသူများဘက် တင်ပြထားသော သက်သေ ၆ဦးအနက် ၂ဦးကို စတင်စစ်ဆေးသွားမည်ဖြစ်ကြောင်း မြို့နယ်တရားရုံးမှ သိရပါသည်။
မြို့နယ်တရားရုံးမှ ရုံးချိန် ၇ ကြိမ်ချိန်းဆိုခဲ့ပြီ ဖြစ်သော်လည်း တရားလို ယာယီ ဒုရဲမှူး မင်းသန့်ဇော် ဘက်ကတော့ စစ်ဆေးမှု တစ်ရက်သာတက်ရောက်ခဲ့ပြီး ကျန်ရုံးချိန်းများတွင် တက်ရောက်ခဲ့ခြင်း မရှိပေ။
လက်ရှိ တရားစွဲခံထားရသော လူငယ် ၂ဦးမှာ ဇွန်လ ၉ရက်နေ့ ကချင်စစ်ဘေး(၈)နှစ်ပြည့်အထိမ်းအမှတ်အဖြစ် မြစ်ကြီးနား စိမ်းမြဧရာ ပန်းခြံ နှင့် ပြည်သူ့ရင်ပြင် အားကစားကွင်း ၂နေရာတွင် ခွင့်ပြုချက်မတောင်းဘဲ လူစုရုံးပြုခဲ့သည်ဟု ဆိုကာ ငြိမ်းစုစည် ပုဒ်မ ၁၉ဖြင့် တရားစွဲဆိုထားခံရခြင်းဖြစ်ပါသည်။
