ကချင်ပြည်နယ် ဗန်းမော်မြို့ မိုင်းခေါင်ကျေးရွာ KBC စစ်ရှောင်စခန်းအတွင်း ယမန်နေ့ မနက်တွင် မီးလောင်မှုဖြစ်ပွားခဲ့သဖြင့် အရေးပေါ် အကူညီများ လိုအပ်နေကြောင်း သိရပါသည်။
မီးဖိုချောင်မှ စတင်လောင်ကျွမ်းခဲ့ခြင်းဖြစ်ပြီး အိမ်ထောင်စု (၅) စု၏ လူနေအိမ်တန်းလျား(Shelter) နှင့် အိမ်သုံးပစ္စည်းများ မီးလောင်မှုတွင် ပါဝင်ဆုံးရှုံးသွားကြောင့် စစ်ရှောင်စခန်းတာဝန်ခံ ဆရာနော်မိုင်ထံမှ သိရပါသည်။
“စပြီး လောင်တာက ထမင်းချက်ပြီး မီးစနဲနဲကျန်ရာ ကနေ စလောင်တာဖြစ်မယ်။ အခုလတ် တလောလိုအပ်နေတာက ဆောင်းရာသီဆိုတော့ စောင် နဲ့ အနွေးထည် ချက်စားဖို့ အိုး ခွက်တွေ လိုအပ်နေတယ်။”ဟု မိုင်းခေါင်စစ်ရှောင်စခန်း တာဝန်ခံက ဆိုပါသည်။
မီးလောင်မှုအတွင်း ပစ္စည်းဆုံးရှုံးမှုတန်ဖိုး ကျပ်သိန်း ၃၀ ခန့် ရှိကြောင်း ဆက်ဆိုထားသည်။
မိုင်းခေါင်စစ်ရှောင်စခန်းကို မြန်မာ့တပ်မတော်နှင့် ကချင်လွတ်လပ်ရေးတပ်မတော် KIA တို့ တိုက်ပွဲကြောင့် ၂၀၁၃ ခုနှစ်တွင် စတင်ဖွင့်လှစ်ခဲ့ပြီး ယခုအချိန်တွင် အိမ်ထောင်စု ၄၀၀ ကျော် လူဦးရေ ၁၈၀၀ နေထိုင်သည့် စစ်ရှောင်စခန်းတစ်ခုဖြစ်ပါသည်။
