ကချင်ပြည်နယ်တွင် ဆိုက်ရောက်နေပြီဖြစ်သော ထိုင်းပြည်တော်ပြန် ၇၀၀ ကျော်အနက် ပထမဆုံးအကြိမ် ၄၄ ယောက်ကို စစ်ဆေးခဲ့ရာ တစ်ဦးမျှပိုးမတွေ့ရသေးကြောင်း ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်အရ သိရသည်။
မေလကုန်ပိုင်းကစပြီး ကချင်ပြည်နယ်အစိုးရက ထိုင်းပြည်တော်ပြန်များကို စတင်လက်ခံခဲ့ရာ လက်ရှိတွင် စုစုပေါင်း ၇၂၆ ဦး ရှိနေပြီဖြစ်သည်။
“ထိုင်းကပြန်လာတဲ့သူတွေကို ဟိုမှာလည်း စစ်ခဲ့တာပေါ့။ ပြီးမှ ဒီကို ပို့တယ်။ ဒီမှာလည်းရောက်တော့ လည်း ၂၁ရက် ကွာရန်တင်းထားတယ်။ ပြီးမှ ဆေးစစ်ဆေးမှုတွေပြုလုပ်တာပေါ့။ အဲ့ထဲမှာ အခု ပထမ စစ်တဲ့ထဲမှာ ၄၄ရောက်က ပိုးမတွေ့ရဘူးပေါ့လေ” ဟု ပြည်နယ် Covid-19 ထိန်းချုပ်ရေးနှင့် အရေးပေါ်တုံ့ပြန်ရေး ကော်မတီမှ ဒုညွန်ကြားရေးမှူး ဦးတင့်နိုင် က ပြောသည်။
ဇွန်လ ၁၂ရက်နေ့တွင်လည်း ထိုင်းပြည်တော်ပြန် ၁၄၃ ဦး ပြန်လည်ရောက်ရှိလာမည်ဟု သူက ဆက်လက်ပြောဆိုခဲ့သည်။
မြစ်ကြီးနားမြို့အတွင်း ထိုင်းပြည်တော်ပြန်များကို ပညာရေးကောလိပ်ကျောင်း၊ သားဖွားသင်တန်းကျောင်းနှင့် ဟိန္ဒူဘုရားကျောင်း စသောနေရာတွင်ထားရှိပြီး စုစုပေါင်း၂၅၄ဦးခန့်ရှိကြောင်း မြစ်ကြီးနား မြို့နယ်အုပ်ချုပ်ရေးမှူး ဦးသန်းဝင်း ထံမှ သိရသည်။
ကျန်ရှိသူများကို ၎င်းတို့သက်ဆိုင်သော မြို့နယ်အလိုက် ကွာရန်တင်းထားရှိနေကြောင်း သိရသည်။
