ကချင်စစ်ဘေး ၈ နှစ်ပြည့် လမ်းဘေးတေးသရုပ်ဖော်တင်ဆက်မှုကြောင့် ငြိမ်းစုစီပုဒ်မ ၁၉ ဖြင့် တရားစွဲဆိုခံထားရသော လူငယ် ၂ ဦး အမှုနှင့်ပတ်သက်ပြီး စွပ်စွဲခံရသူဘက် နောက်ထပ် သက်သေ၂ ဦးကို ယနေ့ မြစ်ကြီးနား မြို့နယ် တရားရုံးတွင် စစ်ဆေးခဲ့ပါသည်။
ထိုသူ ၂ ဦးမှာ ဦးမဂျီဘရန်အောင် (Slg. Maji Brang Awng) နှင့် ဦးဖော့နဘောက်နော် (Slg.Hpauna Bawk Naw) ဖြစ်ပြီး ကချင်လူငယ်များ၏ လမ်းဘေးတေးသရုပ်ဖော်ပြမှုသည် ငြိမ်းစုစီ ပုဒ်မ ၁၉ ဖြင့် ညှိစွန်းကြောင်း စွပ်စွဲချက်ပေါ် ပြန်လည်ခုခံပြောဆိုခဲ့သည်ဟု ဦးဖော့နဘောက်နော် က ယခုလို ပြောဆိုပါသည်။
“ ဒါက ဆန္ဒပြတာလည်းမဟုတ်ဘူး။ အားလုံးမြင်သိတဲ့အတိုင်း ဇွန် ၉ရက်နေ့ဆို အမှတ်တရ တစ်ခုခုကို နှစ်စဉ် လုပ်နေတာလည်းဖြစ်တယ်။ ခုဆိုလည်း လူငယ်တွေအနေနဲ့ တေးသရုပ်ဖော်သာ လုပ်ခဲ့တယ်။ ဒါကြောင့် လုံးဝငြိမ်းစုစီ နှင့် မညှိဘူး” ဟု ထွက်ဆိုခဲ့ကြောင်း ပြန်လည်ပြောဆိုပါသည်။
စွပ်စွဲခံရသူများ သက်သေအဖြစ် ၆ ဦးကို တင်ပြထားပြီး လာမယ့်အပတ် သြဂုတ် ၁၅ ရက်နေ့တွင် နောက်ဆုံး ကျန်ရှိသက်သေ၂ ဦးကို စစ်ဆေးမည်ဖြစ်ကြောင်း သိရပါသည်။
လက်ရှိ ငြိမ်းစုစီ ပုဒ်မ ၁၉ ဖြင့် တရာစွဲဆိုထားခံရသော မဆိုင်းနူးပန် နှင့် ကိုပေါလု တို့ ၂ ဦးမှာ ဇွန်လ ၉ရက်နေ့ ကချင်စစ်ဘေး(၈)နှစ်ပြည့် အထိမ်းအမှတ်အဖြစ် မြစ်ကြီးနား စိမ်းမြဧရာ ပန်းခြံ နှင့် ပြည်သူ့ရင်ပြင် အားကစားကွင်း ၂ နေရာတွင် ခွင့်ပြုမိန့်မတင်ဘဲ လူစုရုံးပြုခဲ့သည်ဟုဆိုကာ မြို့နယ် ယာယီဒုရဲမှူး ဦးမင်းသန့်ဇော် မှ တရားလိုပြုကာ တရားစွဲဆိုထားခြင်း ဖြစ်ပါသည်။
