အင်ဂျန့်ယန်မြို့နယ်တွင် စစ်ကောင်စီတပ်ဖွဲ့များ စစ်အင်အားအများအပြား တိုးချဲ့ လာသဖြင့် ကချင်လွတ်လပ်ရေးတပ်မတော် KIA က လမ်းမကြီးကို ရက်အကန့်အသတ်မရှိ ပိတ်ဆို့ထားကြောင်း သိရသည်။
နိုဝင်ဘာလ ၃ ရက်နေ့မှစကာ အာဏာသိမ်းစစ်ကောင်စီတပ်ဖွဲ့ စစ်အင်အား ၂၀၀ ဝန်းကျင်ခန့်သည် အင်ဂျန့်ယန်မြို့နယ်သို့ ဝင်ရောက်လာသောကြောင့် တိုက်ပွဲများ ပြင်းထန်လာနိုင်သည့်အတွက် မည်သူမှ သွားလာဖြတ်သန်ခွင့် မရှိအောင် ဂွေထောင် (Gwi Htau) ကျေးရွာအနီးတဝိုက်တွင် KIA က လမ်းပိတ်ဆို့ထားသည်မှာ ၁၀ ရက်ခန့် ကြာမြင့်လာပြီဟု အင်ဂျန့်ယန်ဒေသခံတစ်ဦးက KNG သတင်းဌာနကို ပြောဆိုခဲ့သည်။
“အင်ဂျန့်ယန်လမ်းကို KIA က ပိတ်ထားတာ ဒီနေ့ဆို ၁၀ ရက်လောက်ရှိလာပြီ။ စစ်ကောင်စီတပ်သားတွေ စစ်အင်အား တိုးချဲ့လာတဲ့ နောက်ပိုင်းပိတ်လိုက်တယ်။ စစ်တပ်က ပြည်သူကိုအကာကွယ်ယူပြီး ထပ်မံစစ်အင်အား တိုးချဲ့လာမှာကို စိုးရိမ်လို့ ခဏယာယီပိတ်ထားတယ်လို့ဘဲသိရတယ်။ အခုဆို ဘယ်သူမှ သွားလာလို့မရဘူးပေါ့နော်” ဟုပြောဆိုသည်။
စစ်ကောင်စီအနေဖြင့် အင်ဂျန့်ယန်မြို့နယ်အတွင်းသို့ စစ်အင်အားအများအပြားဖြင့် ဝင်ရောက်လာသည်မှာ စစ်ရိက္ခာသယ်ပို့ယူနိုင်ရန်နှင့် KIA ကို တိုက်ခိုက်ရန်ဖြစ်နိုင်သည်ဟု သူက သုံးသပ်ပြောဆိုသည်။
လက်ရှိ KIA က လမ်းပိတ်ဆို့ထားသည့်မှုကြောင့် အဆိုပါလမ်းမကြီးတစ်လျှောက် ဂွေထော်၊ တန်ဘောင်ယန်၊ ဆနီတူယန်၊ လဆီးဇွပ်၊ ခွန်စိုင်တော်ယန်၊ ကျော်စာ၊ ဘွမ့်နိမ့်ယန်နှင့် ကဒါ့ဇွပ့် စသောကျေးရွာများမှာ သွားလာဖြတ်သန်းခွင့် မရရှိသေးဘဲ ရှိနေသည်ဟု သိရသည်။
နိုဝင်ဘာလ ၇ ရက်နေ့ နံနက်ပိုင်း ၇နာရီခန့်က အဆိုပါအာဏာသိမ်းစစ်တပ်ကို ဆွမ့်ဒွန့် (SumDun Bum) ကျေးရွာအနီးတဝိုက်တွင် KIA တပ်ရင်း (၄) က ကြားဖြတ်တိုက်ခိုက်ခဲ့သောကြောင့် ၂ ဖက် အပြန်အလှန်တိုက်ပွဲ ဖြစ်ပွားခဲ့ကြောင်း သိရသည်။
ပြီးခဲ့သော မတ်လကလည်း အင်ဂျန့်မြို့နယ်အတွင်းရှိ ဂွေထော်၊ တန်ဘောင်ယန် စသော ကျေးရွာအနီးတဝိုက်တွင် အာဏာသိမ်းစစ်ကောင်စီနှင့် ကချင်လွတ်လပ်ရေးတပ်မတော် KIA တို့ တိုက်ပွဲဖြစ်ပွားခဲ့သောကြောင့် ဒေသခံအချို့ မြစ်ကြီးနားမြို့ဘက်သို့ ထွက်ပြေးတိမ်းရှောင်ခဲ့ရပြီး အများစုမှာ လမ်းခရီးပိုမိုခက်ခဲသော ဘွမ်ရာဘက်အထိ ထွက်ပြေးနေရဆဲဖြစ်သည်။
