မြန်မာ-တရုတ်နယ်စပ် ရွှေလီမြို့ကို လော့ခ်ဒေါင်းဖြေလျှော့ပေးပြီး ကျယ်ဂေါင်မှာနေသူအချို့ကိုလည်း ပြန်နေခွင့်ပြုပြီဖြစ်ကြောင်း သိရပါတယ်။
ရွှေလီမြို့ကို ၇ ရက်ကြာ လော့ခ်ဒေါင်းချခဲ့ပြီးတဲ့နောက် ယမန်နေ့ နိုဝင်ဘာလ ၁၅ ရက်နေ့ တရုတ်စံတော်ချိန် ည ၁၂ နာရီမှာ လော့ခ်ဒေါင်း ဖြေလျှော့ပေးပြီဖြစ်ကြောင်း ယူနန်ကျန်းမာရေးဌာနက အခုလိုသတင်း ထုတ်ပြန်ထားပါတယ်။
“ရွှေလီ လော့ခ်ဒေါင်း ဖွင့်ပြီ။ ၁၅ ရက် တရုတ် အချိန် ည ၁၂ နာရီမှာ။ ၁၄ ရက်အတွင်း ရောဂါဖြစ်ခဲ့တဲ့ နေရာကလွဲလို့ ကျယ်ဂေါင်မှာ နေတဲ့လူတွေလည်း သူ့စည်းကမ်းနဲ့အညီ ပြန်နေခိုင်းမယ် လို့ သိရတယ်။” လို့ မြန်မာရွှေ့ပြောင်းလုပ်သား တစ်ဦးက ပြောပါတယ်။
သို့ပေမယ့် ၁၄ ရက်အတွင်း ပိုးတွေ့ အတည်ပြုလူနာရှိခဲ့တဲ့နေရာတွေနဲ့ ပိုးတွေ့လူနာနဲ့ ထိတွေ့ခဲ့တဲ့ လူတွေရှိတဲ့ နေရာတွေကို ဆက်ပိတ်ထားမှာဖြစ်တယ်လို့ သိရပါတယ်။
ကျယ်ဂေါင်မြို့ အပါအဝင် ရွှေလီမြို့ကို နိုဝင်ဘာလ ၈ ရက်နေ့ကစ လော့ခ်ဒေါင်း ၇ ရက် ပြန်လည် သတ်မှတ်ခဲ့ပြီး ရောဂါအခြေနေအရ ရက် ထပ်တိုး၊ ထပ်လျှော့မှာဖြစ်ကြောင်း ယူနန်ပြည်နယ် ကျန်းမာရေးဌာနက အသိပေးထုတ်ပြန်ခဲ့ တာလည်း ဖြစ်ပါတယ်။
မြန်မာ – တရုတ် နယ်စပ် နှစ်နိုင်ငံ ကုန်သွယ်ရေး ဂိတ်ပေါက်တွေ ဖွင့်နိုင်ဖို့ ပြင်ဆင်ကြိုးစားနေကြောင်း သတင်းတွေပြန့်နေပေမယ့် ပန်ဆိုင်း – ဝမ်တိန်ဂိတ်ပေါက်ကို နိုဝင်ဘာလ ၇ ရက်နေ့က သံတံခါးနဲ့ အလုံပိတ်ခဲ့ပြီး မူဆယ် နန်းတော်ပေါက်ကိုလည်း ယခုရက်ပိုင်းအတွင်း ထပ်မြှင့်ကာရံကာ ပိတ်လိုက်တာကို တွေ့ရပါတယ်။
Bum Shep
