စစ်ပြေးဒုက္ခသည်များသတင်း

မြစ်ကြီးနား ဇီးအွန် စစ်ရှောင်စခန်းတွင် စားနပ်ရိက္ခာအရေးပေါ်ထောက်ပံ့ရန် လိုအပ်နေ

အိမ်ထောင်စု တစ်ရာကျော် မှီတင်းနေထိုင်သော ကချင်ပြည်နယ်၊ မြစ်ကြီးနားမြို့၊ လယ်ကုန်းရပ်ကွက်ရှိ ဇီးအွန် (ဇီးလွန်) စစ်ရှောင်စခန်းတွင် အစားအသောက်အတွက် အကူအညီလိုအပ်နေကြောင်း စခန်းတာဝန်ခံများမှ သိရသည်။

”ကျွန်တော်တို့ဆီမှာ အခုလောလောဆယ်တော့ အစားအသောက်ပဲခက်ခဲနေတယ်။ အစားအသောက်ကအရင်ကဆိုရင် လူကယ်ပြန်ကလာပေးတယ် ဆန်တွေဘာတွေလာပေးတယ်။ အခုတစ်လ နှစ်လတော့ လာပေးတာမရှိတော့ဘူး။ နေ့စားသွားပြီးမှ ဝယ်စားနေရတာ။ အလုပ်ကလည်း နေ့တိုင်းမရှိတော့ ခက်ခဲနေတာ”ဟု ၎င်းကပြောသည်။

ဇီးအွန် စစ်ရှောင်စခန်းတွင် အိမ်ထောင်စု ၁၃၆ စု၊ လူဦးရေ ၆၉၇ ဦး မှီတင်းနေထိုင်နေပြီး ဒီဇင်ဘာလနှင့် ယခုလအတွင်း မည့်သည့် အထောက်အပံ့မျှမရှိသေးသည့်အတွက် ပိုမိုခက်ခဲလာကြောင်း ၎င်းကဆက်ပြောသည်။

ယခင် ဇီးအွန်စစ်ရှောင်စခန်းတွင် လူကယ်/ပြန်ဌာနမှ လူတစ်ဦးလျှင် ဆန် ၇ ပြည်နှုန်းဖြင့် နောက်ဆုံးအကြိမ်လာရောက်ထောက်ပံ့ထားခဲ့သော်လည်း နိုဝင်ဘာလမှစကာ ထောက်ပံ့မှုမရှိတော့သည့်အပြင် အခြားအဖွဲ့အစည်းများလည်း လာရောက်ထောက်ပံ့ခြင်း မရှိကြောင်း သိရသည်။

”အခုနောက်ပိုင်းက အရင်လို အဖွဲ့အစည်းတွေလည်း အထောက်အပံ့မရှိသလောက်နည်းသွားတယ်။ ပြီးတော့အရင်ကဆိုရင် ကလေးတွေလည်း ဆိုင်မှာတွေမှာအလုပ်ဝင်လုပ်တဲ့လူရှိတဲ့ မိသားစုဆိုရင်သူတို့က ပြန်ထောက်ပံ့နိုင်တယ်။ အခုက ကလေးတွေလည်းအရင်လိုအလုပ်မရှိတော့ ပိုပြီးခက်ခဲလာတယ်။ စားသောက်ရေးကတော့” ဟု ဇီးအွန်းစစ်ရှောင်စခန်းမှ စစ်ရှောင်ပြည်သူတစ်ဦးကပြောသည်။

ဇီးအွန် စစ်ရှောင်စခန်းသည် ကချင်ပြည်နယ်အတွင်း စစ်ကောင်စီတပ်နှင့် ကချင်လွတ်လပ်ရေးတပ်မတော် KIA တို့ တိုက်ပွဲကြောင့် လွန်ခဲ့သည့် ၁၀ နှစ်ကျော်ကတည်းက ထွက်ပြေးလာသော စခန်းတစ်ခုဖြစ်သည်။

Related Articles

Back to top button