စစ်ကိုင်းတိုင်း၊ ကောလင်းနယ်၊ ရှမ်းကလုံး ကျေးရွာမှ ဒေသခံ ၃ ဦးအား နိုဝင်ဘာလ ၁၀ ရက်နေ့တွင် စစ်ကောင်စီမှ ဖမ်းဆီးသွားကြောင်း သိရသည်။
“ရှမ်းကလုံးရွာက ဒေသခံ ယောကျ်ားလေး သုံးယောက်ဖမ်းဆီး ခေါ်ဆောင်သွားတယ်။ တစ်ယောက်ကိုနောက်ပြန်ကြိုးတုတ်တယ်။ ကျန်တဲ့နှစ်ယောက်ကိုတော့ ဒီအတိုင်းဖမ်းဆီးသွားတယ်။ နောက်ပြန် ကြိုးတုတ်ခံရတဲ့သူက နှိပ်စက်ထားရတယ်လို့ သိရတယ်” ဟု ပြောသည်။
စစ်ကောင်စီတပ်သည် ယနေ့ ၂ နာရီဝန်းကျင် ရှမ်းကလုံးကျေးရွာ၊ ဘုန်းကြီးကျောင်းအတွင်း အင်အား ၁၀၀ ဝန်းကျင်ဝင်ရောက်လာကာ ဘုန်းကြီးကျောင်းအတွင်း စစ်ရှောင်နေသူများအား မိမိနေအိမ်ပြန်ခိုင်းခဲ့သည့်အပြင် အသက်ကြီးပိုင်းနဲ့ စစ်ရှောင်များအား ကူညီပေးနေသူအချို့ကို စစ်ဆေးမေးမြန်းပြီးနောက် ယခုကဲ့သို့ ဒေသခံ ၃ဦး ဖမ်းဆီးသွားခြင်းဖြစ်ကြောင်း ၎င်းက ဆက်ပြောသည်။
ဖမ်းဆီးခံရသူများမှာ လူလတ်ပိုင်းနှစ်ဦးနှင့် အသက် ၂၀ ဝန်းကျင် လူငယ် ၁ ဦး ဖြစ်ကြောင်း သိရသည်။
စစ်ကောင်စီတပ်သည် ရှမ်းကလုံးကျေးရွာတွင် ယခင်ရက်များကလည်း ဝင်ရောက်စစ်ဆေးမှုများ ပြုလုပ်ခဲ့ပြီး ရွာသားတဦးနဲ့တခြားရွာသားတစ်ဦးကိုလည်း လမ်းပြအဖြစ် ခေါ်ဆောင်ခဲ့ဖူးကာ ပြန်လည်လွတ်ခဲ့ဖူးကြောင်း နီးစပ်သူများက ဆိုသည်။
ရှမ်းကလုံးရွာသည် ကောလင်းနယ်၏ အနောက်ချမ်းတွင် တည်ရှိပြီး အိမ်ခြေပေါင်း ၄၀၀ နီးပါးခန့်ရှိသည့် ကျေးရွာဖြစ်သည်။
စစ်တပ် အာဏာသိမ်းပြီးနောက် ပြီးခဲ့သည့် အင်တာနက်ဖုန်းလိုင်းများဖြတ်တောက်လိုက်သည့် ပြည်နယ်၊ တိုင်းများအနက် စစ်ကိုင်းတိုင်းသည် အဆိုးရွားဆုံး ခံစားနေရခြင်းဖြစ်သည်။
