ဝိုင်းမော် KIA တပ်စခန်းတစ်ခုကို တပ်မတော်က လက်နက်ကြီးဖြင့် ပစ်ခတ်

ဝိုင်းမော်မြို့နယ်အရှေ့ဘက် ဝါးရှောင်ကျေးရွာအနီးတွင်ရှိသော ကချင်လွတ်လပ်ရေးတပ်မတော် KIA တပ်ရင်း ၃ ရှေ့တန်းစခန်းတစ်ခုကို ဇန်နဝါရီလ ၇ ရက်နေ့ တပ်မတော်က လက်နက်ကြီးဖြင့် ပစ်ခတ်ခဲ့သည်ဟု သိရသည်။

နန်ဇော်တွင်အခြေချနေသော တပ်မတော် ခမရ ၃၈၉ ဟု ယူဆရသော စစ်ကြောင်းက KIA ၏ ရှေ့တန်းစခန်းဖြစ်သော Wa Shaga Bum ကို လက်နက်ကြီးဖြင့် ၁၀ ကြိမ်ထက် မနည်း ပစ်ခတ်ခဲ့သည်ဟု KIO သတင်းစာမျက်နှာတွင် ယနေ့အတည်ပြုထားသည်။

လက်နက်ကြီးပစ်ခတ်သည့်သတင်းကိုရရှိသော်လည်း အသေးစိတ်အချက်အလက်ကို မသိရှိရသေးကြောင်း KIO ၏ ပြန်ကြားရေးတာဝန်ခံ ဗိုလ်မှုးကြီးနော်ဘူက KNG သတင်းဌာနကို ယနေ့ မနက်ပိုင်းက ပြောဆိုသည်။

နန်ဇော်အနီးတစ်ဝိုက်တွင် တောင်ယာလုပ်ကိုင်နေသော ပြည်သူများကလည်း ထိုလက်နက်ကြီးပစ်ခတ်သည့်အသံများကြောင့် ခေတ္တတိမ်းရှောင်ခဲ့ရသည်ဟု ဆိုသည်။

ဝိုင်းမော် လမြန်-မုတ်ကြိတ်ဘက်မှ ဝင်ရောက်ရသော နန်ဇော်ကျေးရွာဘက်တွင် တပ်မတော်စစ်ကြောင်းက လှုပ်ရှားမှုများရှိလာသောကြောင့် ထိုနေရာတွင် တောင်ယာလုပ်ကိုင်နေသော ပြည်သူများကို စပါးအမြန်ရိတ်သိမ်းရန် ပြီးခဲ့သည့် နိုဝင်ဘာလကတည်းကနေ KIA ဘက်က ပြောဆိုထားသည်ဟုလည်း စုံစမ်းသိရှိရသည်။

ဝိုင်းမော် KIA တပ်စခန်းတစ်ခုကို တပ်မတော်က လက်နက်ကြီးပစ်ခတ်တိုက်ခိုက်မှုကြောင့် နောက်ဆက်တွဲ တိုက်ပွဲဖြစ်ပွားမှုများမရှိသော်လည်း နှစ်ဖက်တပ်ကြား စစ်ရေးတင်းမာမှုများရှိနေသည်ဟု KIO ဘက်က ဆိုထားသည်။