မြစ်ကြီးနားရှိ သပိတ်အဖွဲ့များ စုပေါင်းကာ စစ်ကြောင်းတစ်ခုတည်းဖြင့် ဆန္ဒဖော်ထုတ်နေ
မြစ်ကြီးနားမြို့တွင် အကြမ်းဖက်စစ်အာဏာရှင်ကို ဆန့်ကျင်သော သပိတ်စစ်ကြောင်းအားလုံး ပေါင်းစည်းပြီး ‘မြစ်ကြီးနား လူထုသပိတ်စစ်ကြောင်း’ အဖြစ် တစ်ကြောင်းတည်းသာ လမ်းလျှောက်ဆန္ဒ ဖော်ထုတ်နေကြောင်း သိရသည်။
ကချင်ပြည်နယ် မြစ်ကြီးနားမြို့တွင် အာဏာသိမ်းစစ်အုပ်စုမှ ဆန္ဒပြပြည်သူများအား လက်နက်ဖြင့် ဖြိုခွဲပစ်သတ်ခဲ့ပြီးနောက် မြို့တွင်းဆန္ဒဖော်ထုတ်မှုများကို ကျောင်းသားသမဂ္ဂများပါဝင်သော ပင်မသပိတ်စစ်ကြောင်း ၊ Generation Z လူငယ်များနှင့် အထွေအထွေသပိတ်စစ်ကြောင်း စသဖြင့် အင်အားခွဲကာ လမ်းလျှောက်ဆန္ဒဖော်ထုတ်ခဲ့ကြသည်။
“ကျတော်တို့ ပေါင်းပြီးထွက်တာ နှစ်ကြိမ်ရှိပြီ။ အင်အားစုတွေပြန်လည်စုပြီးထွက်တာ ဟုတ်တယ်။ ကျတော်တို့ အစည်းအဝေးပြုလုပ်ပြီး အင်အားပူးပေါင်းလိုက်တာဖြစ်တယ်။ ခါတိုင်းကွဲနေတယ်ဆိုတာက စစ်ခွေးတွေ အလုပ်ရှုပ်အောင် ခွဲပြီးပြတာဟုတ်တယ်။” ဟု သပိတ်စစ်ကြောင်းအတွင်းပါဝင်သူ လူငယ်တစ်ဦးက ပြောသည်။
ယခင်က သပိတ်စစ်ကြောင်း ၂ ခု ၃ သုံးခုဖြင့် ဆန္ဒဖော်ထုတ်ခဲ့သူများလက်ရှိအချိန် အင်အားစုစည်းထားသော်လည်းအခြေအနေအရ ပုံသေသတ်မှတ်ထားမည် မဟုတ်ကြောင်း ဆက်လက်ပြောဆိုသည်။
အကြမ်းဖက်စစ်အုပ်စုမှ ဆန္ဒပြ ပြည်သူလူထုအား ပစ်သတ်ဖြိုခွင်းမှုများပြုလုပ်ခဲ့သော်လည်း ကချင်ပြည်နယ်တွင် စစ်အာဏာရှင်ကိုဆန့်ကျင်သောသပိတ်စစ်ကြောင်းများ ပျောက်ကွယ်မသွားဘဲ မြို့နယ်တိုင်းတွင် နေ့စဉ်ပြုလုပ်နေသည်ကို တွေ့ရသည်။
ထိုအထဲတွင် ဖားကန့်မြို့ သပိတ်စစ်ကြောင်းများသည် လူအင်အားထောင်ချီပါဝင်သော အင်အားအများဆုံး သပိတ်စစ်ကြောင်းများဖြစ်သည်ကို သိရသည်။
