သတင်း

ကွတ်ခိုင် ပြည်သူ့ဆေးရုံအုပ် ပစ်သတ်ခံရ

ရှမ်းပြည်နယ်မြောက်ပိုင်း၊ ကွတ်ခိုင်မြို့နယ် ပြည်သူ့ဆေးရုံအုပ် ဒေါက်တာ ဝင့်ဝင့်မြိုင် ဒီဇင်ဘာ ၁၄ ရက်ည ၇ နာရီဝန်းကျင်ခန့်က ပစ်သတ်ခံရ‌ကြောင်း သိရပါတယ်။

ဒီဇင်ဘာ ၁၄ ရက်‌နေ့ မုံးစီးဘက်  ကာကွယ်ဆေး သွား‌ရောက်ထိုးနှံပေးခဲ့ပြီးအပြန် မော်ဟန်ရွာနဲ့ ကွတ်ခိုင်ကြား နောင်ချိုရွာနားမှာ ကားကိုတားတာကြောင့် ကားပေါ်က ဆင်းလာတာပြီး ဒူးထောက်ခိုင်းပြီး ‌နဖူး တေ့ပစ်ခံရတဲ့အပြင် အခြားခန္ဓာကိုယ် နေရာ တွေမှာလည်း ၅ နေရာခန့် ပစ်ခတ် ဒဏ်ရာ တွေရတယ်လို့  အမည်မဖော်လို ၁ ဦးက ပြောပါတယ်။

“သူနဲ့ အတူ ကားသမားရယ်၊ နာ့စ် ၃ ယောက်ရယ် သူတို့ ၅ ယောက်။ ကားကိုတားပြီး ဆင်းခိုင်းပြီး သူ့ကိုပဲ ပစ်သတ်သွားတာ။ ကျန်တဲ့ သူတွေကို မော်ဟန်ဘက် ကားနဲ့ ပြန်လှည့်ခိုင်းတယ်လို့ သူတို့ ပြောပြတယ်။ အလောင်းကတော့ လမ်းမှာပဲ။ ည သန်းခေါင်ကျော်မှ သွားကောက်နိုင်တာ။ မနက် ၂ နာရီကျော်မှ ရောက်တယ်။” လို့ သူက ပြောပါတယ်။

မနေ့ည အဆိုပါ အခင်းဖြစ်ပွားပြီးနောက် အဲဒီနေရာကို လူမှုကူညီ‌ရေးအသင်းအချို့ကို အဝင်မခံပဲ ပိတ်ထားတဲ့အတွက် အသင်း ၃ သင်းအတူ ပူးပေါင်းကာသွားရောက် သယ်ယူခဲ့ရတယ်လို့ ဆိုပါတယ်။

ဆေးရုံအုပ် ဒေါက်တာဝင့်ဝင်မြိုင်ဟာ CDM လုပ်ဆောင်နေတဲ့ ကျန်းမာရေး ဝန်ထမ်းတွေကို ဖိအားပေး ခြိမ်းခြောက်တဲ့အပြင် ငွေကြေးမတတ်နိုင်သူတွေကိုလည်း ဆေးကုသပေးမှု မပေးချင်သူဖြစ်တယ်လို့ ဒေသခံ‌တွေကြား ပြောဆိုမှုအများအပြားရှိနေပါတယ်။

စစ်ကောင်စီ အာဏာသိမ်းပြီးနောက် ပြည်သူ့ဆေးရုံထဲ စစ်ကောင်စီတပ်တွေကို စခန်းချ နေထိုင်ခွင့် ပြုခဲ့တာတွေ၊ ပူးပေါင်းလုပ်ဆောင်ခဲ့တာတွေလည်း ရှိခဲ့တာကြောင့် မနှစ်မြို့သူတွေ အများအပြားရှိတယ်လို့ ဆိုပါတယ်။

Show More

Related Articles

Back to top button