စစ်ကောင်စီ၏ ရေယာဉ် ၂စီးပစ်ခတ်ခံရပြီး တစ်စီးကို ကာကွယ်ရေးတပ်ဖွဲ့များ သိမ်းပိုက်ရရှိ
စစ်ကိုင်းတိုင်းဒေသကြီး မုံရွာအထက် ကနီမြို့နယ်ဘက်သို့ ဆန်တက်လာသော စစ်ကောင်စီ ရိက္ခာတင်ရေယာဥ်နှစ်စီး သောင်တင်နေစဥ် ကာကွယ်ရေးတပ်ဖွဲ့များ စီးနင်းတိုက်ခိုက်ခဲ့သဖြင့် ရိက္ခာတင်ယာဥ်ကို ကာကွယ်ရေးတပ်ဖွဲ့များသိမ်းပိုက်ရရှိခဲ့ကြောင်း သိရသည်။
ဒီဇင်ဘာလ ၃ ရက်နေ့တွင် အင်အား ၇၀ ခန့်ပါရှိသည့် ရေယာဉ်တစ်စီးနှင့် ရိက္ခာတင်တစ်စီးတို့ဖြင့် ကနီမြို့နယ်ကို ဦးတည်ကာ ချင်းတွင်းမြစ်ကြောင်းတစ်လျှောက် ထွက်ခွာလာစဉ် ကနီမြို့၏ ငါးဖျတ်ကျေးရွာအရောက်တွင် ကာကွယ်ရေးတပ်ဖွဲ့ဝင်များ ကြားဖြတ်တိုက်ခိုက်ခဲ့သည်ဟု Deparment Of Information-DRPA မှ တာဝန်ရှိသူတစ်ဦးကဆိုသည်။
“မုံရွာကနေ ဖလပ်အမြန်ယာဥ်နှစ်စီးနဲ့ တက်လာတယ်။ တစ်စီးက ရိက္ခာတင်လာတယ် နောက်တစ်စီးက အင်အား ၇၀ လောက်ပါတယ်။ ကနီမြို့နယ် ငါးဖျတ်ရွာအရာက်နားမှာ အဲ့ ရေယာဥ်နှစ်စီးထဲက ရိက္ခာတင်တဲ့တစ်စီးက သောင်တင်နေတယ်။ အဲ့တာနဲ့ ကျနော်တို့က သတင်းကြိုရထားတော့ လက်နက်ကြီးတွေ မောင်းပြန်တွေနဲ့ တိုက်ခိုက်ခဲ့ပါတယ်။ အပြန်အလှန်ပစ်ခတ်မူတွေလည်းရှိခဲ့တယ်။ သူတို့ဘက်က ၂ ယောက်ကျသွားပါတယ်။ ပြီးရင် သူတို့ရဲ့ ရေယာဥ်ကိုလည်း သိမ်းပိုက်ရရှိခဲ့ပါတယ်”ဟုဆိုသည်။
ထိုနေရာတွင် ၂ နာရီခန့်အကြာ ပစ်ခတ်မှုရှိခဲ့ပြီး ကာကွယ်ရေးတပ်ဖွဲ့ဘက်မှ ရေယာဉ်နှင့်အတူ သယ်ဆောင်လာသည့် ဆန်အိတ် ၈၂ အိတ်၊ ပဲ ၁၀ အိတ်၊ စားဆီပုံ ၁ ပုံ၊ စစ်သုံးကျောပိုးအိတ် ၃ လုံး၊ ကျည်ကာအင်္ကျီများ သိမ်းပိုက်ရရှိခဲ့ကာ ရေယာဉ်ကို မီးရှို့ဖျက်ဆီးခဲ့ကြသည်ဟု သိရသည်။
ထို့အပြင် စစ်ကောင်စီ အင်အား ၇၀ ခန့်ပါရှိလာသည့် ရေယာဉ်သည်လည်း ငါးဖျတ်ကျေးရွာအကျော်တွင် ယနေ့နံနက်ပိုင်းအထိ သောင်တင်နေသဖြင့် အနီးတဝိုက်ရှိသော ကျေးရွာလူနေအိမ်များတွင် ဝင်ရောက်စီးနင်းလာမည်ကို ဒေသခံပြည်သူများတစ်ချို့က စိုးရိမ်နေကြကြောင်း သတင်းအရင်းအမြစ်များကပြောသည်။
