အင်းတော်မြို့နယ် မော်လူးကျေးရွာတွင် ဧပြီလ ၂ ရက်နေ့ လေပြင်းတိုက်ခတ်ခဲ့သောကြောင့် လူနေအိမ်အများအပြား ထိခိုက် ပျက်စီးခဲ့ကြောင်း သိရသည်။
အင်းတော်မြို့နှင့် မိုင် ၂၀ ကျော် ကွာဝေးသော မော်လူးကျေးရွာတွင် ယမန့်နေ ညနေပိုင်း ၄ နာရီဝန်းကျင် လေပြင်းတိုက်ခတ်ခဲ့သဖြင့် လူနေအိမ် ၃၀ ထက်မနည်း ထိခိုက်ပျက်ဆီးခဲ့ကြောင်း အင်းတော်ဒေသခံ အမျိုးသားတစ်ဦးက KNG ကို ပြောသည်။
”နေအိမ်တွေ တော်တော်များများတော့ ပျက်စီးသွားတယ်ဗျ။ အိမ်တွေကော ယိုင်နေအရမ်းများတယ်။ အတိအကျတော့ မသိရဘူး များလို့ မင်းရာဇာရပ်ကွက်မှာဆိုစာသင်ကျောင်းအမိုးတွေကော လှန်တယ်နောက်ပြီးတော့ ကျန်တဲ့ရပ်ကွက် တွေမှာကောအတူတူပဲ ကျွန်တော်မြင်ခဲ့တာအရမ်းများတယ်”ဟုပြောသည်။
အဆိုပါ လေပြင်းတိုက်ခတ်မှုကြောင့် လူနေအိမ်များပြိုလှဲခြင်း၊ အမိုးအကာများပျက်စီးခြင်း၊ ကျောင်းဆောင်များ ပျက်စီးခြင်း ၊ လမ်းဘေးဓာတ်တိုင်များ လှဲကျခြင်းတို့ဖြစ်ပွားခဲ့ပြီး လူထိခိုက်မှု မရှိခဲ့ကြောင်း သိရသည်။
မော်လူးကျေးရွာအပြင် မော်လူးကျေးရွာနှင့် နီးစပ်သည့် ကျေးရွာများတွင်လည်း လေပြင်းတိုက်ခတ်ခဲ့ပြီး လူနေအိမ်အများ အပြားပျက်စီးခဲ့ရာ စာရင်းအတိအကျရရှိရန် စုံစမ်းနေဆဲ ဖြစ်သည်။
မော်လူးကျေးရွာသည် အိမ်ခြေ ၁၀၀၀ ကျော်၊ လူဦးရေ ၂၀၀၀ ကျော်ခန့်နေထိုင်သော ကျေးရွာတစ်ခုဖြစ်ကြောင်း သိရသည်။
