အောင်မြေ ၁ ၊ အောင်မြေ ၂ တစ်ဝိုက်မှာ တိုက်ပွဲဖြစ်ပွားနေပြီး စစ်တပ်က လေယာဉ်နဲ့ လက်နက်ကြီးဖြင့်ပါ ပစ်ကူနေ

ဝိုင်းမော်မြို့နယ် အောင်မြေ(၁) ကျေးရွာနဲ့ ရွှေညောင်ပင်ကြားက ၉ မိုင်မှာ တိုက်ပွဲဖြစ်ပွားနေပြီး စစ်တပ်က လက်နက်ကြီးနဲ့ ပစ်ခတ်နေသလို လေယာဉ်နဲ့လည်း လာရောက်ပစ်ခတ်နေတယ်လို့ သိရပါတယ်။

မတ်လ ၉ ရက်နေ့ ဒီမနက်အစောပိုင်းကနေ ရွှေညောင်ပင် ခမရ ၃၂၁ တပ်ကနေ စစ်ယာဉ်တန်းနဲ့ ထွက်လာတဲ့ စစ်ကောင်စီ စစ်ကြောင်းကို ခါးရှီ၊ အောင်မြေ ၁ နဲ့ အောင်မြေ ၂ တဝိုက်မှာ ကချင်လွတ်လပ်ရေးတပ်မတော် KIA၊ PDF ပူးပေါင်းတပ်ဖွဲ့တွေ ကြားဖြတ်တိုက်ခိုက်ပြီး တိုက်ပွဲပြင်းထန်နေတာလို့ သိရပါတယ်။

ဒီမနက် ၁၀ နာရီလောက်ကနေ စစ်တပ်က လေကြောင်းနဲ့ အောင်မြေ ၁ ကျေးရွာဘက်ကို လာရောက်ပစ်ခတ်နေသလို မြစ်ကြီးနားမြောက်ပိုင်းတိုင်းစစ်ဌာနချုပ် မပခ နဲ့ ဝိုင်းမော်မြို့  ခလရ ၅၈ တပ်ရင်းကနေလည်း  လက်နက်ကြီးနဲ့ ဆက်တိုက်ပစ်ခတ်နေတယ်လို့ ဒေသခံတွေ ပြောပါတယ်။

“လေယာဉ်နဲ့ လာပစ်နေတယ်။ လက်နက်ကြီးနဲ့ရော ဆက်တိုက်ပစ်နေတယ်။ ဘယ်ကို ဘယ်ကိုကျတာလဲ မသိတော့ဘူး။ ဘယ်မှလည်းထွက်လို့ မရဘူး။ မြစ်ကြီးနားဘက်က လက်နက်ကြီးပစ်တာ အောင်မြေ ၁ မှာလာကျတာ ရွာသားတွေ ထိတာရှိတယ်လို့တော့ ကြားတယ်။ ဘယ်နှယောက်ထိတယ်လည်း မသိဘူး။ အခုထိလည်း လက်နက်သံတွေ မြည်နေတုန်း။ မနေ့ညကနေ ဆက်တိုက်ပဲ။” ဟု အောင်မြေ ၁ အနီး နေထိုင်သူဒေသခံတစ်ဦးက ပြောပါတယ်။ 

မနေ့ည ကတည်းက စစ်တပ်က အောင်မြေ ၁ နဲ့ အောင်မြေ ၂ ကျေးရွာဖက်ကို လက်နက်ကြီးပစ်ခတ်တာကြောင့် အရပ်သားထိခိုက်မှုတွေရှိတယ်လို့ သိရပေမယ့် မြေပြင်အခြေအနေ အသေးစိတ်ကို မသိရသေးပါ။

လက်ရှိ အောင်မြေ ၁၊ အောင်မြေ ၂ နဲ့ ရွှေညောင်ပင် ဒေသခံပြည်သူတချို့ ဘေးလွတ်ရာကို ထွက်ပြေးတိမ်းရှောင်နေကြ တယ်လို့လည်း သိရပါတယ်။

“အခု ရွှေညောင်ပင်နဲ့ အောင်မြေသစ်ကြားပစ်နေကြတာ။ အောင်မြေ ၂ က တစ်ယောက်ကိုမှ ဖုန်းဆက်လို့မရဘူး။ အောင်မြေ ၁ ကရွာသားတွေကတော့ အားလုံးနီးပါး တိမ်းရှောင်ကြပြီပြောတယ်။ အခု မြို့ဘက်ကိုလည်း သွားလို့မရဘူး။ လမ်းပိတ်ထားတယ်။ လှုပ်လို့လည်းမရ။ ဘယ်လိုလည်းမသိတော့ဘူး။” ဟု နောင်စီပေါ ဒေသခံတစ်ဦးကပြောပါတယ်။

မတ်လ ၈ ရက်နေ့ အောင်မြေ ၁ ကျေးရွာ အင်လုံခ (Nlung Hka) တံတားမှာ တပ်စွဲတဲ့ ရွှေမင်းပြည်သူ့စစ်စခန်းကို ကချင်လွတ်လပ်ရေးတပ်မတော် KIA က တိုက်ခိုက်ဖျက်ဆီးခဲ့ပါတယ်။

ဒါကြောင့် လက်ရှိ အဲဒီလမ်းမတစ်ကြော ပြည်သူ့စစ်အဖွဲ့တွေအပါအဝင် စစ်ကောင်စီတပ်ဖွဲ့နဲ့ ကချင်လွတ်လပ်ရေးတပ်မတော် KIA တို့အကြား တိုက်ပွဲဆက်လက်ပြင်းထန်နေတာဖြစ်ပါတယ်။

By – ဂျာဘောက်ရာ