ပြည်တွင်းစစ်များ ရပ်တန့်ရန် ကချင်အမျိုးသားအတိုင်ပင်ခံအဖွဲ့တောင်းဆို
နှစ်ပေါင်း (၇၀) နီးပါးဖြစ်ပွားခဲ့သော မြန်မာ့ပြည်တွင်းစစ်ကို အဆုံးသတ်ရန် စက်တင်ဘာလ ၂၁ ရက်နေ့ ကမ္ဘာ့ငြိမ်းချမ်းရေးနေ့တွင် ကချင်အမျိုးသားများအတိုင်ပင်ခံအဖွဲ့ WMR က ထုတ်ပြန်တောင်းဆိုခဲ့သည်။
တိုင်ရင်းသားတော်လှန်ရေးအဖွဲ့များနှင့် အစိုးရ၊ တပ်မတော်ကြား အသိတရားဖြင့် နားလည်မှုတည်ဆောက်ပြီး ငြိမ်းချမ်းရေးကို အတူတကွဖော်ဆောင်ရန် ထုတ်ပြန်ခြင်းဖြစ်သည်ဟု ဆိုသည်။
သို့သော် လက်ရှိ Covid-19 ရောဂါ ကူးစက်မှုနှုန်းမြင့်တက်နေချိန်တွင် အပစ်အခတ်ရပ်ဆိုင်းရေးကို လက်တွေ့လုပ်ဆောင်ခြင်းမရှိပဲ ရခိုင်ပြည်နယ်တွင် ပြင်းထန်သည့်ထိုးစစ်နှင့်အတူ ရှမ်းပြည်နယ်မြောက်ပိုင်းတွင်လည်း စစ်ဆင်ရေးများ ထပ်မံပြုလုပ်လာသည်ကို တွေ့နေရကြောင်း ထုတ်ပြန်ချက်တွင် ဖော်ပြထားသည်။
“ရှမ်းပြည်နယ်မြောက်ပိုင်းဘက်မှာလည်း ထိုးစစ်ဆင်မှုတွေ ပြန်ပြီးမှရှိလာတယ်၊ ပြီးရင် ရခိုင်ပြည်မှာလည်း တိုက်ပွဲတွေနှင့် ထိုးစစ်ဆင်မှုတွေဆက်တိုက်ရှိနေတယ် ဆိုတော့ တစ်ဖက်မှာလည်း ကမ္ဘာ့ကပ်ရောဂါ Covid-19 လည်း မြန်မာပြည်အနှံ့ ကူးစက်မှုနှုန်းအရှိန်မြင့်လာနေတယ်။ ဒါတွေကိုစဉ်းစားပြီး တစ်နိုင်ငံလုံး အေးချမ်းသာယာဝပြောလာဖို့ရန်နှင့် တန်းတူညီမျှရေး၊ တို့ကိုရှေ့ရှုပြီး စစ်ပွဲများ၊ ပဋိပက္ခများရပ်တန့်ပြီး ငြိမ်းချမ်းရေးအတွက်တွေ့ဆုံဆွေးနွေးရန် တိုက်တွန်းလိုတာကြောင့် ထုတ်ပြန်ရခြင်းဖြစ်တယ်” ဟု ကချင်အမျိုးသားများအတိုင်ပင်ခံအဖွဲ့ ပြောရေးဆိုခွင့်ရှိသူ ဆရာဦးအင်ခွမ်တန်ဂွန်း က ပြောသည်။
ကချင်ပြည်နယ်အတွင်း စစ်ဘေးရှောင်ပြည်သူများလုံခြုံစိတ်ချစွာနေရပ်ပြန်နိုင်ရေးအတွက် တပ်မတော်နှင့် ကချင်လွတ်လပ်ရေးတပ်မတော် KIA တို့ကြား Bilateral အဆင့် အပစ်ရပ်သဘောတူလက်မှတ်ထိုးထားနိုင်မှ ယုံကြည်မှုရရှိ နိုင်မည်ဟု ဆိုသည်။
ကမ္ဘာ့ကုလသမဂ္ဂမှ ၁၉၈၁ ခုနှစ်၊ စက်တင်ဘာလ ၂၁ ရက်နေ့တွင် ကမ္ဘာ့ငြိမ်းချမ်းရေးနေ့အဖြစ် UNGAS တွင် သဘောတူညီမှုရရှိခဲ့ကြသည်။
