စစ်ကိုင်းတိုင်း၊ ကသာဘက်သို့ ဆန်တက်လာသည့် စစ်ကောင်စီတပ် သင်္ဘော ၂ စီး ကို ယနေ့ နံနက်ပိုင်းက Katha PDF အဖွဲ့မှ ရှော့တိုက်ဒုန်း ၂လုံးဖြင့် စောင့်ကြိုတိုက်ခိုက်ခဲ့ကြောင်း သိရသည်။
မတ်လ ၁၄ ရက်နေ့ ယနေ့ နံနက် မန္တလေးမှ ကသာဘက်သို့ စစ်အင်အား တင်ဆောင်လာသည့် အဆိုပါသင်္ဘောကို ကသာမြို့ အောက်ဖက် ပန်းသေးရွာအနီးတွင် ပစ်ခတ်တိုက်ခိုက်ခဲ့သည်ဟု ဒေသခံတစ်ဦးက ယခုလိုပြောသည်။
“ညနေ ၃ နာရီ ၁၅ မိနစ် ကသာကမ်းကို ဆိုက်လာတယ်။ အဲနောက် ၄ နာရီ၁၀ မိနစ်လောက်မှာ ကသာဆိပ်ကမ်းကနေ လူနာတင်ယာဥ် ၄ စီးနဲ့ ကသာဆေးရုံကိုမောင်းသွားတယ်။ ထိခိုက်သေဆုံးမူများနိုင်တယ်။ လူနာတင်ယာဉ်က ၄စီးတောင် ဟုတ်တယ်။ ထိခိုက်သေဆုံးတာတော့ အသေးစိတ် မသိရသေးဘူး” ဟု ဒေသခံတစ်ဦးက ပြောသည်။
ပစ်ခတ်မှုကို KATHA PDF အဖွဲ့က လုပ်ဆောင်ခဲ့ခြင်းဖြစ်ပြီး ရှော့တိုက်ဒုံး ၂ လုံးဖြင့် ပစ်ခတ်ခဲ့ရာ တစ်လုံးမှာ သဘော်အတွင်းသို့ တည့်တည့်ကျရောက်ပေါက်ကွဲသွားသည်ဟု ဆိုသည်။
ပြီးခဲ့သည့် မတ်လ ၁၁ ရက်နေ့တွင်လည်း ကသာနယ်အဆုံး ရွှေကူမြို့နယ် လုတ်တိုင်းချောင်းအနီး စစ်ကောင်စီတပ်၏ စက်လှေ ၂ စီးကို မြို့လှ PDF မှ တိုက်ခိုက်ခဲ့သည်။
အလားတူ မတ်လ ၁၃ ရက်နေ့တွင်လည်း ကသာနယ်၊ ချောင်းဝရွာအနီး သင်္ဘောလုံခြုံရေးယူပေးမည့် ခြေလျင်တပ်ကို မြို့လှ PDF မှ စောင့်ကြို တိုက်ခိုက်ခဲ့သည့် ဖြစ်စဉ် ဖြစ်ပွားခဲ့သည်။
စစ်ကိုင်းတိုင်း၊ ကသာမြို့နယ်နှင့် ကချင်ပြည်နယ် ရွှေကူမြို့နယ်တို့သည် စစ်ကောင်စီတပ်နှင့် ဒေသခံကာကွယ်ရေးတပ်တို့ မကြာခန တိုက်ပွဲဖြစ်ပွားလေ့ရှိသည်။
