သတင်း

လွယ်ဂျယ်မြို့ ကုန်မာဆိုင် ဓါးပြတိုက်ခံရပြီး ဆိုင်ရှင်အမျိုးသားလည်း သတ်ဖြတ်ခံရ

ကချင်ပြည်နယ် တရုတ်မြန်မာနယ်စပ် လွယ်ဂျယ်မြို့ ကုန်မာဆိုင်တစ်ဆိုင်တွင် ဓါးပြဝင်တိုက်ခံရပြီး ဆိုင်ရှင်အမျိုးသား လည်ပင်းလှီး သတ်ဖြတ်ခံရကြောင်း ဒေသခံများထံမှ သိရသည်။

မတ်လ ၁၂ ရက် ည ၈ နာရီဝန်းကျင်တွင် လွယ်ဂျယ်မြို့ ရပ်ကွက် ၄ အုပ်ချုပ်ရေးရုံး မျက်နှာချင်းဆိုင် အိမ်ဆောက်ပစ္စည်းနှင့် ပရိဘောဂ ဆိုင်တစ်ဆိုင်တွင် ဓါးပြဝင်တိုက်ခံရလိုက်ပြီးနောက် ဆိုင်ရှင်ကိုပါ သတ်ဖြတ်သွားကြောင်း ဒေသခံတစ်ဦးက ယခုလိုပြောသည်။

ဆိုင်မှာတပ်ထားတဲ့ CCTV ကို အရင်ရိုက်ချိုးလိုက်ပြီးတော့ ဆိုင်ကို ဓါးပြဝင်တိုက်တာတဲ့ အဲ့ဒါကို ဆိုင်ရှင်ရောတစ်ခါတည်း လှည်ပင်းမှာ လှီးသတ်ခဲ့တာလို့ သိရတယ်ဟုပြောသည်။

အသတ်ခံရတဲ့သူသည် အသက် ၆၀ ဝန်းကျင်ရှိ တရုတ်လူမျိုး ဒိန်ဂျူဆိုသူ ဖြစ်ကြောင်း သိရသည်။

ထို့အပြင် ပြစ်မှုကျူးလွန်သူသည် မည်သူမည်ဝါဖြစ်ကြောင်း မသိရှိရသေးသည့်အပြင် လက်ရှိချိန်ထိလည်း ဖမ်းဆီးရမိခြင်း မရှိဘဲ ထွက်ပြေးလွှတ်မြောက်နေကြောင်း ဒေသခံများက ပြောသည်။

ဒေသခံများ၏ ပြောပြချက်အရ အသတ်ခံလိုက်ရသည့် ဦးဒိန်ဂျူးသည် ဆိုင်၌တစ်ဦးတည်းနေထိုင်ချိန် သတ်ခံလိုက်ရခြင်းဖြစ်ပြီး ဆိုင်တွင်းရှိ တန်ဖိုးရှိပစ္စည်းမည်မျှ ယူဆောင်သွားခြင်းကိုတော့ အသေးစိတ်မသိရသေးပေ။

ဘယ်လောက်ပါသွားလဲဆိုတာကိုတော့ အတိအကျမသိသေးဘူး ပြီးတော့ လာသတ်သွားတာလည်း ဘယ်သူဘယ်ဝါဆိုတာ မသိရသေးဘူးဟုအခြားဒေသခံတစ်ဦးက ပြောသည်။

ကချင်တရုတ်နယ်စပ် ကုန်သွယ်ရေးမြို့ဖြစ်သည့် လွယ်ဂျယ်မြို့သည် တရုတ်နိုင်ငံသားလုပ်ငန်းရှင်အများအပြား လွယ်ဂျယ်ဘက်သို့ ကုန်မာဆိုင်၊ အထည်ဆိုင်၊ အစားအသောက်များ ရောင်းချခြင်းဖြင့် စီးပွားရေးလာရောက် လုပ်ကိုင်နေသူများစွာ ရှိသည်။

ထို့အပြင် စစ်တပ် အာဏာသိမ်းပြီးနောက် အခြားနေရာဒေသများမှ ဝင်ရောက်နေထိုင်သူလည်း များလာကြောင်း သိရသည်။

Show More

Related Articles

Back to top button