စစ်ရေးတင်းမာမှုရှိနေသည့် ရွှေကူမြို့နယ်တွင် စစ်ကောင်စီတပ်က လျှပ်စစ်မီးနှင့် ဆက်သွယ်ရေးဖုန်းလိုင်းများ ဖြတ်တောက်ထားကြောင်း ဒေသခံများထံမှသိရသည်။
မတ်လ ၂၃ ရက်နေ့မှစတင်ကာ ရွှေကူအရှေ့ဘက်ခြမ်းနေရာတွင် စစ်ကြောင်း ၃ ခုဖြင့် စစ်ကြောင်းထိုးလာသည့် စစ်ကောင်စီတပ်ဖွဲ့နှင့် ကချင်လွတ်လပ်ရေးတပ်မတော် KIA ၊ PDF တို့ကြား တိုက်ပွဲ ၃ ကြိမ်ထက်မနည်းဖြစ်ပွားခဲ့ပြီး လက်ရှိအချိန်အထိ စစ်ရေးတင်းမာမှုရှိနေဆဲဖြစ်သည်။
ယခုလို စစ်ရေးတင်းမာမှုရှိနေသည့်အတွက်ကြောင့် မတ်လ ၂၇ ရက်နေ့မှ လျှပ်စစ်မီးများ ဖြတ်တောက်ခံထားရသည်ဟု ရွှေကူဒေသခံတစ်ဦးက KNG ကိုပြောသည်။
”လျှပ်စစ်မီးလည်းဖြတ်ထားတယ် ။ မနေ့ကတစ်နေကုန် တစ်ညလုံးမလာဘူး ဒီနေ့လည်းခုထိမလာသေးဘူး ရွှေကူမှာခါတိုင်းဒီလိုင်မီးမပျက်ဘူး။ ရွှေကူတစ်မြို့နယ်လုံးပဲရွာတွေလည်းမလာဘူး ဗန်းမှော်မြို့နယ်ထဲတော့လာတယ်”ဟုပြောသည်။
ထို့အပြင် ဆက်သွယ်ရေးဖုန်းလိုင်းများဖြစ်ကြသည့် Atom ဖုန်းလိုင်း၊ Mytel ဖုန်းလိုင်းနဲ့၊ MPT ဖုန်းလိုင်းများလည်း နေရာကွက်ပြီး ဖြတ်တောက်ထားခံရကြောင်း နောက်ထပ် ရွှေကူဒေသခံတစ်ဦးကပြောသည်။
”ဖုန်းလိုင်းကမြို့ထဲမှာတော့ရတယ်။ တယ်လီနောတော့သိပ်မပေါချင်ဘူးမြို့ထဲမှာလည်း ရွာဘက်တွေမှာတော့ တယ်လီနော၊ MPT ၊ Mytel တွေဖြတ်ထားတယ် နေရာကွက်ကျားဖြတ်ထားတယ်။ ဆက်လို့မရဘူး”ဟုပြောသည်။
တိုက်ပွဲ စတင်ဖြစ်ပွားခဲ့သည့် နောက်ပိုင်းမှ ဆက်သွယ်ရေးဖုန်းလိုင်းများစတင်ပြတ်တောက်လာပြီး ယနေ့ မတ်လ ၂၈ ရက်နေ့အထိ ရွှေကူမြို့နယ်အတွင်း ဖုန်းလိုင်းများပိုမိုခက်ခဲသွားကြောင်း သိရသည်။
လက်ရှိ စစ်ရေးတင်းမာမှုဖြစ်ပွားနေသည့် နေရာသည် တိုက်ပွဲဖြစ်ပွားခဲ့သော ရွှေကူမြို့အရှေ့ဘက်ခြမ်း မံဝိန်း၊ ဝင်ဝ၊ ငှက်တံတား၊ နောင်လတ်ကြီး ၊ စီသောင်၊ စီမူလေးစသည့်ကျေးရွာများဖြစ်ကြပြီး ထို ကျေးရွာနေရာများတွင် စစ်ကောင်စီဘက်မှ စစ်ကြောင်းထိုး ဝင်ရောက်နေဆဲရှိနေကြောင်း ဒေသခံများကပြောသည်။
ရွှေကူအရှေ့ဘက်ခြမ်းတွင် စစ်ကောင်စီ စစ်ကြောင်းထိုးဝင်ရောက်လာခဲ့သဖြင့် KIA ၊ PDF တို့က ကြားဖြတ်ဝင်ရောက်ခဲ့သောကြောင့် မတ်လ ၂၄ မနက်ပိုင်းနောင်လတ်ကြီးကျေးရွာအနီးတွင်တစ်ကြိမ်၊ မတ်လ ၂၃ ရက်နေ့က ငှက်တံတားကျေးရွာအနီးတွင်တစ်ကြိမ်နဲ့ မတ်လ ၂၆ ရက်နေ့ မနက်ပိုင်း စီမူလေးကျေးရွာအတွင်းတွင် တစ်ကြိမ် သုံးကြိမ်တိတိတိုက်ပွဲ ဖြစ်ပွားခဲ့သည်။
ထိုတိုက်ပွဲများတွင် စစ်ကောင်စီဘက်မှ ထိခိုက်ဒဏ်ရာရရှိသူ များပြားပြီး စစ်သား ၅ ဦးထက်မနည်း သေဆုံးမှုရှိခဲ့ကြောင်း ဒေသကာကွယ်ရေးတပ်ဖွဲ့ဝင်များထံမှသိရသည်။
