ဖားကန့်မြို့နယ် နမ်တိန့် ရွာက စစ်ကောင်စီတပ်ရဲ့တပ်စခန်းအားလုံး ကချင်လွတ်လပ်ရေးတပ်မတော် KIA၊KPDF ပူးပေါင်းတပ်တွေက တိုက်ခိုက်သိမ်းပိုက်ထားပေမယ့် စစ်တပ်ဘက်က ပြန်လည်ရယူဖို့ အပြင်းအထန်ကြိုးစားနေတယ်လို့ KIA ရှေ့တန်းသတင်းရင်းမြစ်တွေဆီကနေ သိရပါတယ်။
စစ်ကောင်စီတပ်တွေဟာ နမ်တိန့် ပြန်ရဖို့ ဖေဖော်ဝါရီလ ၁၁ ရက်နေ့ကစပြီး ဖားကန့်ယမ်းချက်တပ်ထဲကနေ အင်အား ၈၀ ဝန်းကျင်နဲ့ နမ်တိန့်ဘက်ကို စစ်ကြောင်းထိုးလာတာကြောင့် နမ်တိန့်မရောက်မှီ ၆ မိုင်အနီးမှာ KIA ၊KPDF တပ်တွေကကြားဖြတ်တိုက်ခိုက်နေတဲ့အတွက် နှစ်ဖက်တိုက်ပွဲပြင်းထန်နေတာလို့ ဖားကန့်KPDF တာဝန်ရှိသူတစ်ဦးက KNG ကိုပြောပါတယ်။
“စစ်ကောင်စီတွေက နမ်တိန့် ကို ပြန်ထိုင်ချင်နေတာ မနေ့ကတည်းကအဲ့ယမ်းချက်ထဲကထွက်လာကြတာ လမ်းမှာကြားဖြတ်တိုက်ခိုက်ရေးအဖွဲ့တွေရှိတယ်။ သူတို့နဲ့ ဖြစ်နေတာ အခုထိ ဖြစ်နေတုန်း”လို့ပြောပါတယ်။
နမ်တိန့် ဘက်ကို တက်လာတဲ့စစ်ကြောင်းကို KIA၊KPDF က ဖားကန့်ကနေ ငါးမိုင်ကျော်အကွာ(ဒေသအခေါ် ကျောက်ဖျာ)အနီးမှာ ကြားဖြတ်တိုက်ခိုက်ခဲ့တာကြောင့် မနေ့က မနက် ၇ နာရီကနေ ဒီကနေ့ မွန်းလွဲပိုင်းအထိတိုက်ပွဲတွေဆက်ဖြစ်နေတုန်းပဲ လို့သိရပါတယ်။
လက်ရှိ ဖားကန့် – နန့်ယားကြားမှာ တိုက်ပွဲပြင်းထန်နေတာကြောင့် ဖားကန့်–နန့်ယားကားလမ်းပိုင်းကိုလည်းယာယီပိတ်ထားတယ်လို့သိရပါတယ်။
“လမ်းပိုင်းကခနပိတ်ထားတယ်ဗျ ဟိုဘက်က လာတဲ့ကားတွေလည်းနန့်ယားဂိတ်မှာပိတ်နေသလိုဒီဘက်ကလည်းလောလောဆယ် တက်လို့မရသေးဘူး”လို့ အထက်မှာဖော်ပြေခဲ့တဲ့ဖားကန့် KPDF တာဝန်ရှိသူ ကပြောပါတယ်။
စစ်ကောင်စီတပ်ဟာ လက်ရှိတိုက်ခိုက်ခံနေရတဲ့ စစ်ကြောင်းယမ်းချက်ကနေထွက်ခွာလာတဲ့ ဖေဖော်ဝါရီလ ၁၁ ရက်နေ့ကစပြီး နန့်ယား၊ ဖားကန့်ဗျူဟာကုန်း စတဲ့နေရာတွေကနေ လက်နက်ကြီးတွေပစ်ကူခဲ့တာကြောင့် နန့်ယားကျေးရွာအနီးမှာ ဦးအေးလှိုင် အသက် ၅၄ နှစ်အရွယ်ကားသမားတစ်ဦး မနက် ၉နာရီ ခွဲအချိန်မှာလက်နက်ကြီးထိမှန်သေဆုံးခဲ့ပါတယ်။
အလားတူ ဒီနေ့မနက် ဖြစ်ပွားခဲ့တဲ့ တိုက်ပွဲမှာလည်းစစ်ကောင်စီတပ်က ဂျက်ဖိုက်တာတစ်စီးနဲ့ ၆ မိုင်ရွာနဲ့ ကျောက်ဖျာအနီးဝန်းကျင်နေရာတွေကို ဗုံးကျဲတိုက်ခိုက်မှုပြုလုပ်ခဲ့တယ်လို့သိရပြီး မနေ့ကတိုက်ပွဲမှာ စစ်တပ်ဘက်က အရာရှိတစ်ဦးအပါအဝင် ၃ ဦးကို KIA,PDF ဘက်က ဖမ်းဆီးရမိထားတယ်လို့လည်း သိရပါတယ်။
ဖားကန့်မြို့နယ်ထဲက နမ်တိန့် ကျေးရွာစစ်တပ်ဗျူဟာကုန်းကို KIA၊KPDF တပ်တွေက ဖေဖော်ဝါရီလ ၂ရက်နေ့မှာ သိမ်းပိုက်နိုင်ခဲ့သလို ဝှေခါစစ်တပ်ကုန်းကိုလည်း ဇန်နဝါရီလ ၂၀ ရက်နေ့မနက်ပိုင်းမှာသိမ်းပိုက်ခဲ့တာ ဖြစ်ပါတယ်။
By – Zaw Zaw
