ဝိုင်းမော်မှာ KIA တပ်ဆုတ်ထားပေမယ့် စစ်တပ်က ဗုံးကြဲတိုက်ခိုက်နေဆဲ

ဝိုင်းမော်မြို့နယ် အောင်မြေ(၁)၊ အောင်မြေ(၂) ကျေးရွာတွေမှာ ကချင်လွတ်လပ်ရေးတပ်မတော် KIA ပူးပေါင်းတပ် တွေက ထိုးစစ်ဆင်တိုက်ခိုက်တာမရှိတော့ပေမယ့် စစ်တပ်ဘက်ကနေ လေယာဉ်နဲ့ လာရောက်ဗုံးကြဲတိုက်ခိုက်နေသလို လက်နက်ကြီးတွေနဲ့ ပစ်ခတ်နေဆဲဖြစ်တယ်လို့ သိရပါတယ်။

မတ်လ ၁၃ ရက်နေ့ ဒီကနေ့ မနက်ပိုင်း ၇ နာရီ နဲ့ ၉ နာရီဝန်းကျင်လောက်မှာ အောင်မြေ(၁) ၊ အောင်မြေ(၂) ကျေးရွာ ၂ခုရဲ့ ရွာပတ်ပတ်လည်မှာ ဂျက်လေယာဉ် နဲ့ ၂ ကြိမ်တိတိ လာရောက်ဗုံးကြဲသွားတယ်လို့ ဝိုင်းမော်ဒေသခံ အမျိုးသားတစ်ယောက်က KNG ကိုပြောပါတယ်။

“ဂျက်ဖိုက်တာနဲ့ လာပစ်တာ ဒီမနက်မှာတင် ၂ ကြိမ်ရှိသွားပြီ။ ပြီးရင် လက်နက်ကြီးတွေနဲ့လည်း ပစ်ခတ်နေတယ်။ အောင်မြေ(၁)၊ အောင်မြေ(၂) ရွာပတ်လည်တဝိုက်မှာပစ်နေတာ။ ရွာအစွန်ဆုံးနေရာတွေမှာက လက်နကြီးကျတယ်။ ရွာပတ်လည်တွေမှာက KIA တပ်တွေရှိတယ်ထင်လို့ လာပစ်ကြတာ”လို့ပြောပါတယ်။

မတ်လ ၈ နေ့မှာ KIA ပူးပေါင်းတပ်တွေက အောင်မြေ(၁)၊ အောင်မြေ(၂) ကျေးရွာတွေကို ဝင်ရောက်ထိန်းချုပ်လိုက်တာဖြစ်ပြီး ကျေးရွာအတွင်း အရပ်သားပြည်သူတွေ ထိခိုက်တာတွေများလာတဲ့အတွက် မတ်လ ၉ ရက်နေ့မှာ ပြန်လည်တပ်ဆုတ်လိုက်တာဖြစ်ပါတယ်။

ခုလို KIA ဘက်က တပ်ဆုတ်သွားတာဟာ စစ်ကောင်စီတပ်ဘက်က ပိတ်ဆို့ထားတဲ့ပြည်သူတွေအားလုံးကို KIA တပ်ဆုတ်သွားရင် ထွက်ခွင့်ပေးမယ်လို့ဆိုတာကြောင့် တပ်ဆုတ်ပေးပေမယ့် ဗုံးကြဲတိုခိုက်တာက ဆက်လုပ် နေ သေးတာဖြစ်တယ်လို သိရပါတယ်။

စစ်တပ်က ကျေးရွာအနီးတဝိုက်မှာ KIA ပူးပေါင်းတပ်တွေရှိနေသေးတယ်လို့ ယူဆပြီးတော့ လာရောက်ဗုံးကြဲတိုက်ခိုက်နေသလို ဝိုင်းမော် ခလရ ၅၈ တပ်ရင်းနဲ့ မြောက်ပိုင်းတိုင်းစစ်ဌာနချုပ် – မပခ ကနေ လက်နက်ကြီးတွေ ပစ်ခတ်နေတာဖြစ်ပါတယ်။

အောင်မြေ(၂) ဒေသခံပြည်သူတွေ ၇၀၀ ကျော်ကို စစ်တပ်က ရွာထဲက ထွက်ခွင့်မပေးဘဲ လူသားဒိုင်းအဖြစ် အသုံးပြုနေတာ ၅ ရက်မြောက်ကြာမြင့်လာတာဖြစ်ပြီး ပိတ်မိနေတဲ့ ပြည်သူတွေကို ကယ်ထုတ်ဖို့ သက်ဆိုင်ရာ ဘာသာရေးခေါင်းဆောင်များနဲ့ ငြိမ်းချမ်းရေးအကျိုးဆောင်အဖွဲ့ PCG တို့က စစ်တပ်နဲ့ ညှိနှိုင်းနေပေမယ့် ကယ်ထုတ်ခွင့်မရသေးတာလည်းဖြစ်ပါတယ်။

ဒီကနေ့ မတ်လ ၁၃ ရက်နေ့မှာလည်း ဘာသာရေးခေါင်းဆောင်များနဲ့ ငြိမ်းချမ်းရေးအကျိုးဆောင်အဖွဲ့ PCG တို့က ပိတ်မိနေတဲ့ ပြည်သူတွေကို ကယ်ထုတ်ဖို့ရန်အတွက် စောင့်ဆိုင်းနေကြပြီလို့ သိရပါတယ်။

အောင်မြေ(၂)ဒေသခံပြည်သူတွေဟာ ကျေးရွာအတွင်း ပိတ်မိနေတာ ဒီကနေ့အထိဆိုရင် ၅ ရက်မြောက်ကြာမြင့်လာပြီး ရေနဲ့ အစားအသောက်ပြတ်လပ်လာတာကြောင့် အခက်အခဲကြုံတွေ့နေရတာဖြစ်ပါတယ်။

စစ်တပ်က ပိတ်မိနေတဲ့ အောင်မြေ(၂) ဒေသခံပြည်သူတွေကို ရွာဘုန်းကြီးကျောင်းထဲမှာ စုပုံပိတ်ဆို့ထားပြီး ရွာအတွင်းအပြင် နေရာတွေမှာ ထွက်လာလို့မရအောင် ဝါးလုံးတန်းထားပြီးတော့ စစ်အင်အား ၃၀ ဝန်းကျင်လောက်နဲ့ လုံးခြုံရေးတင်းကြပ်ထားတာလည်းဖြစ်ပါတယ်။

By – နော်ထွယ့်(ဟူးကောင့်)