ကျောက်ဝိုင်းကပြန်လာတဲ့ တရုတ်အမျိုးသား ၂ ဦးကို စစ်ကောင်စီတပ်ဖွဲ့တွေ သေနတ်ထောက်ပြီး ငွေသိန်းတစ်ထောင်ကျော်လုယက်

ဖားကန့်မြို့နယ် လုံခင်းကျေးရွာအုပ်စု  မြောက်ကုန်းစစ်တပ်ကုန်းအနီး တရုတ်အမျိုးသား ၂ ဦးကို စစ်ကောင်စီတပ်က သေနတ်ထောက်ပြီး ငွေသိန်းတစ်ထောင်ကျော်လုယူသွားတယ်လို့ ဖားကန့်ဒေသခံတွေဆီကနေ သိရပါတယ်။

နိုဝင်ဘာလ ၂၂ ရက်နေ့ ည ၈ နာရီဝန်းကျင် လုံးခင်းကျောက်ဝိုင်းကနေ ကားနဲ့ ပြန်လာတဲ့ တရုတ်အမျိုးသား ၂ ဦး  (ဒေသအခေါ်) မြောက်ကုန်းစစ်တပ်ကုန်းရှေ့မှာ ဖမ်းဆီးခေါ်ခံရပြီးနောက် ငွေသိန်းတစ်ထောင်ကျော်လုယူခံလိုက်ရတာဖြစ်တယ်လို့ ဖားကန့်ဒေသခံအမျိုးသားတစ်ဦးပြောပြပါတယ်။

“လုံးခင်းကနေ ပြန်လာတဲ့ တရုတ်းအမျိုးသား ၂ ယောက် လုံးခင်းအကျော် မြောက်ကုန်း စစ်တပ်နေရာအောက်နားရောက်တော့ ခြုံမှာပုန်းနေတဲ့ စစ်သား ၃ ယောက် ထွက်လာပြီး သေနတ်ထောက်ခြိမ်းခြောက်တာတဲ့ ခနကြာတော့ စစ်တပ်ကုန်းထဲကို ခေါ်သွားပြီး ကားထဲမှာပါလာတဲ့ ပစ္စည်းတွေအကုန်လုံးထုတ်ပြခိုင်းတယ်တဲ့။ အဲ့ဒီ ၂ ယောက်မှာ ပါလာတဲ့ ငွေသိန်းတစ်ထောင်လောက်ကို ယူပေးလိုက်ပြီး ပြန်လွတ်လိုက်တယ်လို့ပြောတယ်”လို့ပြောပါတယ်။

သေနတ်ထောက်ခြိမ်းခြောက်မှုစလုပ်တဲ့ စစ်ကောင်စီတပ်ဖွဲ့ဝင် ၃ ဦးမှာ အရပ်ဝတ် ဝတ်ထားပြီး သေနတ်တိုကိုင်သူတစ်ဦး သေနတ်ရှည်ကိုင်သူတစ်ဦးအပြင် လက်နက်မကိုင်ပဲ လက်ဗလာနဲ့တစ်ဦးဖြစ်တယ်လို့ သိရပါတယ်။

တရုတ်အမျိုးသား ၂ ဦးကို စဖမ်းပြီး သေနတ်ထောက် မောက်လှဲခံထားရချိန် တစ်ဆက်တည်းမှာပဲ လုံးခင်းကနေ ဆိုင်ကယ်နဲ့ပြန်လာတဲ့ လင်းမယား ၂ ဦးကိုလည်း ရပ်ခိုင်းပြီး  အမျိုးသမီးဖြစ်သူ ဝတ်ဆင်ထားတဲ့ ဆွဲကြိုး၊လက်စွပ်စတဲ့ လက်ဝတ်ရတနာတွေလည်း လုယက်သွားတယ်လို့ ဆက်ပြောပါတယ်။

စစ်ကောင်စီတပ်တွေဟာ တစ်ညထဲမှာပဲ ပြည်သူ ၄ ဦးဆီးက ရွှေ၊ ငွေ လုယက် သိမ်းယူသွားတာဖြစ်တယ်လို့ သိရပါတယ်။

လမ်းသွားလမ်းလာအရပ်သားပြည်သူတွေကို လုယက်မှုလုပ်နေတဲ့ မြောက်ကုန်းနေရာဟာ လုံးခင်းတံဘောင်တံတားအသေးအကျော် စစ်ကောင်စီတပ်တစ်ခုတည်း အထိုင်ချထားတဲ့ နေရာဖြစ်တယ်လို့ ဒေသခံတွေပြောပါတယ်။

အဲဒီ တစ်ကြောမှာ စစ်ကောင်စီတပ်တွေသာ နေရာယူထားတဲ့ နေရာဖြစ်ပြီးတော့ မြောက်ကုန်း စစ်တပ်ကုန်းကနေ သွားတဲ့ လမ်းမကြီးဟာ မလန့်ကျေးရွာကို သွားတဲ့လမ်းမကြီးဖြစ်တယ်လို့ သိရပါတယ်။

ဖားကန့်ဒေသမှာရှိကြတဲ့ မှော်ပြည်သူအများပိုင်းက မြောက်ကုန်းစစ်တပ်ကုန်းမှာ စစ်တပ်ရှိတာကြောင့် နေ့ခင်းရံဖန် ရံခါလွဲပြီး ည ၈ နာရီနောက်ပိုင်းမှာ သွားလာသူမရှိသလောက်နည်းပါးတယ်လို့ သိရပါတယ်။

“အဲ့လမ်းက စစ်တပ်ရှိတာကြောင့် အများပိုင်းက သိပ်မသွားကြဘူး။ သွားရင်တောင် နေ့ခင်းပဲ သွားကြတာများတယ်။ ၈ နာရီနောက်ပိုင်းဆို သိပ်မသွားကြဘူး။ ပြီးရင် အဲဒီလမ်းမှာက တခြား ခိုးဆိုလုယက် သူခိုး ဓါးပြတွေ ရှိမယ့်နေရာလည်းမဟုတ်ဘူး။ အဲဒီတစ်ကြောက မျောက်ကုန်းစစ်တပ်တွေသာရှိကြတယ်။ အဲဒီနေရာက တောင်စောင်းလည်းဖြစ်တာကြောင့် ဘယ်သူက ဘာလုပ်တယ် ။ ဘယ်သူလာတယ် အကုန်လှမ်းမြင်ရတဲ့ နေရာဖြစ်တယ်”နောက်ထပ် ဖားကန့် ဒေသခံ တစ်ဦးက ဆက်ပြောပါတယ်။

ဒါကြောင့် လုံးခင်းတံဘောင်တံတား အကျော် မြောက်ကုန်းအနီးတဝိုက် အရပ်သားပြည်သူတွေ ဆီကနေ လုယက်မှုလုပ်နေတာဟာ စစ်ကောင်စီတပ်တွေသာ ဖြစ်နိုင်တယ်လို့ ဖားကန့် ဒေသခံပြည်သူတစ်ချို့က သုံးသပ်ပြောဆိုနေတာလည်းဖြစ်ပါတယ်။

အလားတူ လက်ရှိ လုယက်မှုဖြစ်စဉ်မတိုင်မှီ ပြီးခဲ့တဲ့ ၄ ရက်အတွင်းမှာလည်း ဖြတ်သန်းသွားလာတဲ့ အမျိုးသား ၄ ဦးကို မြောက်ကုန်း စစ်တပ်ကုန်းထဲခေါ်ယူဝိုင်းရိုက်တာရှိခဲ့တယ်လို့သိရပါတယ်။

ကချင်လွတ်လပ်ရေးအဖွဲ့ KIO အစိုးရအနေနဲ့လည်း ပြည်သူတွေကို မလိုအပ်ပဲ မြောက်ကုန်းစစ်တပ်ကုန်းရှိတဲ့ လမ်းမကြီးဘက်ကို သွားလာရေးဂရုစိုက်ဖို့ ပြောဆိုထားတာရှိတယ်လို့လည်း သတိပေးပြောဆိုထားတာရှိတယ်လို့ သိရပါတယ်။

အဲဒီဖြစ်စဉ်မှာလည်း အမျိုးသား ၄ ဦးမှာ ပါလာတဲ့ ငွေသား သိန်းတစ်ထောင်ကျော်ကို ဖမ်းဆီးရိုက်နက်ပြီး လုယူပေးလိုက်တယ်လို့ သတင်းအရင်းအမြစ်တွေပြောပြပါတယ်။

ဖားကန့် ဒေသမှာ စစ်တပ်အာဏာသိမ်းပြီး ၃ နှစ်ကျော်ကာလအတွင်းမှာ မြို့ပြင် လုံခြုံရေးယူထားတဲ့ စစ်ကောင်စီရဲ့ စစ်ကောင်စီ တပ်နေရာ အများပိုင်းကို KIA ပူးပေါင်းတပ်တွေ သိမ်းယူထားတာဖြစ်ပါတယ်။

အခုနောက်ပိုင်း စစ်ကောင်စီတပ်သားတွေဟာ ဒေသအတွင်း စစ်ရေးလှုပ်ရှားတာတွေ သိပ်မရှိတော့ဘဲ တပ်ရှိထားတဲ့ နေရာတွေမှာသာ လှုပ်ရှားသွားလာနေကြတယ်လို့ ဖားကန့်ဒေသခံတွေပြောပါတယ်။

ဖားကန့် ဒေသထဲမှာ ခြိမ်းခြောက်ပြီး ရွှေ၊ ငွေ လုယက်တာတွေ ခပ်စိပ်စိပ်လုပ်ဆောင်လာတယ်လို့ အုပ်ချုပ်ရေးအဖွဲ့တွေဆီကနေ သိရပါတယ်။