မုံးကိုး- မန်ဟိုင်း မြန်မာ- တရုတ်နယ်စပ်၊ မုံးကိုးမြို့ပေါ်တွင် တရုတ်ပြည်ဘက်သို့ တင်ပို့မည့် ကြံကားများ ရာချီ ပိတ်မိနေကြောင်း ဒေသခံများထံမှ သိရသည်။
တရုတ်နိုင်ငံဘက်မှ ကိုဗစ်ပိုးတွေ့သည်ဟုဆိုကာ ပြီးခဲ့သည့် ဧပြီလ ၂၀ရက်နေ့မှစတင်ပြီး ၁၀ရက်ခန့် ဂိတ်ပိတ်ခဲ့သည့်အတွက် ပန်ဆိုင်း – မုံးကိုးလမ်း၊ မုံးပေါ် – မုံးကိုးလမ်း နဲ့ မုံးကိုးမြို့ပေါ်ရှိ လမ်းကြိုလမ်းကြားတိုင်းတွင် ကြံကားများ ရာချီပိတ်မိနေကြောင်း ဒေသခံတစ်ဦးက ပြောသည်။
“တရုတ်ဘက်ကပိုးတွေ့ရှိတယ်ဆိုပြီး တစ်ပတ်လောက်ပိတ်လိုက်တာ ခုပြန်ဝင်လို့တော့ရပြီ ဒါပေမယ့်ကားတွေလည်း တခါထဲဝင်လို့မရဘူး ပိုးစစ်ပြီး ၄၈ နာရီကြာမှ ပိုးသတ်ထားတယ်။ အဲကြောင့် ကားတွေက ပိတ်မိကုန်ပြီ” လို့ မြို့ခံ ၁ ဦးက ပြောသည်။
တရုတ်ပြည်ဘက်မှ မေလမှစကာ ပြန်လည်ဝင်ခွင့်ပြုခဲ့သော်လည်း ဆေးစစ်မူ ၄၈ နာရီခံယူရသည့်အပြင် တစ်ရက်လျှင်ကားအစီးရေ ၁၀ခန့်သာ ဝင်ရောက်ခွင့်ပြုနေကြောင်း သိရသည်။
မုံကိုး၊မန်ဟိုင်းဂိတ်အား တရုတ်ပြည်ဘက်မှ ကိုဗစ်အကြောင်းပြချက်နှင့် မကြာခနပိတ်နေသည့်အတွက် ပန်ဆိုင်း၊ မုံးကိုးဒေသတွေမှ ကြံများတရုတ်ဘက်တင်ပို့ နိုင်ဖို့ခက်ခဲနေကြောင်း သိရသည်။
“ပြီးခဲ့တဲ့နှစ်တော့ ခုချိန်ဆို ခုချိန်ပြီးသွားပြီ။ မိုးနဲ့ လွှတ်တယ် ဒီလောက်မခက်ခဲခဲ့ဘူး” လို့ ဒေသခံတစ်ဦးကပြောသည်။
ကြံကားများပိတ်မိနေသည့်အပြင် ခုရက်ပိုင်းမိုးရွာမူကြောင့် ကြံကားသမားတွေအစားအသောက် ချက်စားရန်ပင် ခက်ခဲနေသည့်အတွက် ကုန်ကျစရိတ်ပိုများကြောင်း မုံးပေါ်ဒေသက ကြံ ခြံရှင်တစ်ဦးကပြောသည်။
လက်ရှိတွင် ကြူကုတ် (ပန်ဆိုင်း) နဲ့ မုံးကိုး မြို့နယ်ခွဲအတွင်းရှိ ကြံဧက သောင်းချီရှိနေပြီး အဓိက မုံးကိုး – မန်ဟိုင်း မြန်မာ တရုတ် နယ်စပ် ဂိတ်ကနေ တဆင့် တရုတ်ဘက်ကို တင်ပို့နေတာလည်းဖြစ်သည်။
