စစ်ကောင်စီတပ်ဘက်က ပိတ်ထားတဲ့ ကချင်ပြည်နယ် ပူတာအို–မြစ်ကြီးနားကားလမ်းပိုင်းသွားလာခွင့် တစ်ပတ်တစ်ကြိမ်သာဖွင့်ပေးထားတယ်လို့ ဒေသခံများထံမှ သိရပါတယ်။
ပြီးခဲ့တဲ့ အောက်တိုဘာ ၂၃ ရက်နေ့မှာ စစ်ရေးအကြောင်းပြချက်နဲ့စစ်ကောင်စီတပ်ဘက်က ရုတ်တရက်ပိတ်ချလိုက်တဲ့ပူတာအို–မြစ်ကြီးနားလမ်းပိုင်း လက်ရှိအချိန်အထိ ဖြတ်သန်းသွားလာခွင့်ကန့်သတ်ခံထားရဆဲဖြစ်တယ်လို့ ပူတာအို ဒေသခံအမျိုးသားတစ်ဦးကပြောပါတယ်။
“တစ်ပတ်ကိုတစ်ခါပဲလွတ်ပေးတယ်ဗျ။ တစ်ခါတလေစနေနေ့ကိုလွတ်ပေးတယ် တစ်ခါတလေကျတော့ တနဂ်နွေနေ့ကိုလွတ်ပေးတယ် သူတို့လွတ်ပေးချင်တဲ့အချိန်လွတ်ပေးတာ”လို့ ပြောပါတယ်။
အောက်တိုဘာလ ၂၃ ရက်နေ့ ပိတ်လိုက်တဲ့နောက် အဲဒိီလမ်းပိုင်းကို အောက်တိုဘာ ၂၇ ရက်နေ့တစ်ကြိမ်၊ နိုဝက်ဘာ ၇ ရက်နေ့တစ်ကြိမ်၊ နိုဝင်ဘာ ၉ ရက်နေ့တစ်ကြိမ်ဖွင့်ပေးတဲ့နောက်ပိုင်း ဒီနေ့ထိတစ်ပတ်ကိုတစ်ကြိမ်နှုန်းသာဖွင့်ပေးတယ်လို့ သူက ဆက်ပြောပါတယ်။
စစ်ကောင်စီတပ်ဟာ ပူတာအိုကနေ မြစ်ကြီးနားဘက်ဆင်းတဲ့ကားတွေကို မူလာရှီးဒီဂိတ်ကနေတားထားသလို မြစ်ကြီးနားကနေ ပူတာအိုတက်တဲ့ကားတွေကိုလည်း မြစ်ကြီးနားအထက် တန်ဖရဲဂိတ်နဲ့ လမုန်ဇွတ်ဂိတ်နှစ်နေရာကနေ တားထားတယ်လို့သိရပါတယ်။
ဒါ့အပြင် ကားလမ်းဖွင့်ပေးမယ့်ရက်အတိအကျသတ်မှတ်ထားတာမရှိတဲ့အတွက် ကားသမားတွေဟာ လမုန်ဇွတ်နဲ့ တန်ဖရဲဂိတ်တွေမှာတန်းစီစောင့်ဆိုင်းနေရတဲ့အတွက် နေရာထိုင်ခင်းခက်ခဲတာ၊အစားအသောက်ခက်ခဲတာနဲ့ ကုန်ကျစရိတ်များတာ စတဲ့အခက်အခဲ တွေကြုံတွေ့နေရကြောင်းသိရပါတယ်။
“လမ်းဖွင့်ပေးမယ့်အချိန်ကို ကိုယ်က လမ်းတစ်ဝက်မှာလာစောင့်နေရတာလေး ရေမရှိ၊ဆိုင်တွေလည်းမရှိဆိုတော့ခက်တာပေါ့စားဖို့သောက်ဖို့ကပိုဆိုးတာက လမ်းမှာလေးငါးရက်ကြီးစောင့်နေရတော့ ကုန်ကျစရိတ်အရမ်းများတာဆိုးတယ် ပူတာအိုတစ်ခါရောက်ဖို့ကိုလမ်းမှာလေးရက်၊ငါးရက်ကြီးစောင့်နေရတာအဆင်မပြေဘူး”လို့ ကားသမားတစ်ဦးက ပြောပါတယ်။
ခုလိုဖြတ်သန်းသွားလာခွင့် ကန့်သတ်လိုက်တဲ့အတွက် ကုန်ကားတွေဟာ လမ်းခုလတ်မှာစောင့်ဆိုင်းနေရပြီး ကားသမားတွေအတွက်အခက်အခဲဖြစ်တာ၊ကုန်သည်တွေအတွက်လည်းဆုံးရှုံးနစ်နာမှုတွေရှိနေတယ်လို့ ပူတာအိုမြို့ခံ ကုန်စုံဆိုင်ပိုင်ရှင်တစ်ဦးက ပြောပါတယ်။
“လမ်းမှာလေးငါးရက်ကြီးဆိုတော့ ကြာရှည်မခံတဲ့ကုန်တွေက တစ်ဝက်လောက်ပဲ ကောင်းတယ်။ တဝက်လောက်ကပုပ်သိုးကုန်တာပေါ့ အမြတ်မရတဲ့အပြင်အရင်းပါရှုံးတာမျိုးရှိတယ်။ ကြက်ဥဆယ်လုံးမှာ လေးလုံးလောက်က ပုပ်နေတယ်အောက်ပိုင်းကလာတဲ့ အသားငါးဆိုဝယ်လို့တောင်မရဘူး”လို့သူကပြောပါတယ်။
စစ်ကောင်စီကအခုလိုကုန်ကားတွေကိုတစ်ပတ်တစ်ကြိမ်သာလွတ်ပေးတာကြောင့် ပူတာအိုမြို့ပေါ်မှာ မြန်မာပြည်အောက်ပိုင်းကလာတဲ့၊အသား၊ငါးတွေပြတ်လပ်တာ ကြာရည်မခံတဲ့ကြက်ဥ၊ခရမ်းချဥ်သီး၊ကွမ်းရွက်စျေးတွေအဆမတန်စျေးတက်တောတွေရှိနေတယ်လို့သိရပါတယ်။
ထို့အပြင်စစ်ကောင်စီတပ်က ပူတာအိုဒေသဘက် ဆေးဝါး၊မိုးကာ၊စက်သုံးဆီသယ်ယူခွင့်ကိုလည်းတားမြစ်ထားကြောင်းသိရပါတယ်။
စစ်ကောင်စီတပ်နဲ့ ခေါင်လန်ဖူးဌာနေပြည်သူ့စစ်ပူးပေါင်းတပ်တွေဟာ ပြီးခဲ့တဲ့ ၂၀၂၄ ခုနှစ်အတွင်း လက်လွတ်ဆုံးရှူံးခဲ့ရတဲ့ လန်ဆယ်မြို့နဲ့ ခေါင်လန်ဖူးနဲ့ဆော့လော်မြို့နယ်ချင်းစက်မှာရှိတဲ့ လန်ဟီဆင်စခန်းကိုပြန်သိမ်းယူဖို့ ယခုနှစ် အောက်တိုဘာ ၁၉ ရက်နေ့မှာစတင်ထိုးစစ်ဆင်ခဲ့ပေမယ့် အရေးနိမ့်ပြီးပြန်ဆုတ်ထားရတာဖြစ်ပါတယ်။
လက်ရှိမှာတော့ KIAနဲ့ပူးပေါင်းတပ်တွေက ခေါင်လန်ဖူးမြို့နယ်ထဲကစစ်ကောင်စီလက်အောက်ခံပြည်သူ့စစ်စခန်းတစ်ချို့ အောက်တိုဘာလနဲ့နိုဝင်ဘာလထဲမှာထိုးစစ်ဆင်သိမ်းပိုက်နေတာလည်း ဖြစ်ပါတယ်။
အခုလို စခန်းတွေဆက်တိုက်လက်လွှတ်လာရတဲ့အတွက် စစ်ကောင်စီတပ်ဟာ စစ်ရေးတင်းမာနေတဲ့ ခေါင်လန်ဖူးဘက်ကိုဝင်ရောက်နိုင်တဲ့ ပူတာအို– မြစ်ကြီးနားကားလမ်းပိုင်းကိုထိန်းချုပ်ထားတာဖြစ်ပါတယ်။
ပြီးခဲ့တဲ့ ၂၀၂၄ ခုနှစ်တုန်းကလည်း စစ်ရေးနဲ့သဘာဝဘေးကကြောင့် ပူတာအို– မြစ်ကြီးနားလမ်းပိုင်း သုံးလကြာ ပိတ်ထားချိန် ကြက်ဥတစ်လုံးကျပ် ၅၀၀၀၊ ဓာတ်ဆီတစ်ပုလင်းကျပ် ၈၀၀၀၀ အထိစံချိန်တင်မြင့်တက်ခဲ့ပါတယ်။
By – Zaw Zaw
