ဖားကန့်မြို့ ယနေ့ အာဏာရှင်စနစ်ဆန့်ကျင်သော သပိတ်စစ်ကြောင်းကို ဖြိုခွဲရန်သွားသော အာဏာသိမ်းစစ်တပ် ယာဉ်တန်း မိုင်းခွဲတိုက်ခိုက်ခံရမှုတွင် ရဲနှင့်စစ်သားများ ၅ဦးထက်မနည်း သေဆုံးသွားကြောင်း သိရသည်။
ဧပြီလ ၁၃ရက်နေ့ ၁၀ နာရီခန့်အချိန်တွင် ဆန္ဒပြသပိတ်စစ်ကြောင်းကို ဖြိုခွဲရန်သွားသော ရဲနှင့်စစ်သားများကို အေးမြသာယာ မနက်စျေးရှေ့တွင် ၅ကြိမ်ထက်မနည်း မိုင်းခွဲတိုက်ခိုက်ခဲ့သည့်ဖြစ်စဉ်နှင့်ပတ်သက်ပြီး ဒေသခံတစ်ဦးထံမှသိရသည်။
” ဘယ်သူက ဝင်ပစ်တယ်လို့တော့ ကျနော်တို့က မသိရဘူးပေါ့လေ။ ဒါပေမယ့် ဒီအေးမြသာယာ မနက်စျေးထိပ်မှ ဖြစ်သွားတာဟုတ်တယ်။ ရဲနှင့်စစ်သားဘက်က ၅ဦးသေဆုံးသွားတယ်လို့ သိရတယ်။ ပြီးရင် ပြည်သူဘက်ကတော့ ၄ယောက်လောက်တော့ ဒဏ်ရာပြင်းထန်ရတယ်တဲ့ ” ဟုသိရတယ်။
မိုင်းခွဲခံ့ရသည့်နေရာတွင် ရဲနှင့် စစ်သား ၅ ဦးခန့်သေဆုံးပြီးအချို့ဒဏ်ရာ ရရှိသွားသည်ဟု သိရပြီး၊ ပြည်သူဘက်ကလည်း အေးမြသာယာရပ်ကွက်နေထိုင်သည့် ကျောင်းအုပ်ဆရာမတစ်ဦးနှင့် စျေသည်တစ်ဦးအပါအဝင် ၄ ဦးခန့် ပြင်းထန်ဒဏ်ရာရရှိခဲ့သည်ဟုသိရသည်။
ပေါင်တစ်ဖက်တွင် ကျည်ထိမှန်ခဲ့သည့် ကျောင်းအုပ်ဆရာမကြီး၏ ဒဏ်ရာ ပြင်းထန်သည့်အတွက် မြဝတ်ရည် ဆေးရုံတွင် ဆေးကုသခံယူစေပြီး ကျန်ရှိဒဏ်ရာပြင်းထန်သူများကို မြစ်ကြီးနား ဆေးရုံသို့ ပို့ဆောင်လိုက်ပြီဖြစ်ကြောင်း သိရသည်။
