မြစ်ကြီးနားမြို့နယ်၊ နမ်ကျင်ကျေးရွာအထက်၊ တိုင်ယူးယန် လမ်းဘေးရှိတောတစ်နေရာတွင် ဦးခေါင်းမပါရှိတော့သည့် အမျိုးသမီးတစ်ဦး သေဆုံးထားကြောင်း အလောင်းသွားရောက်မြင်တွေ့ခဲ့သည့် နမ်ကျင်ဒေသခံ ဦးလယန်ဂွမ်ပန်ထံမှ သိရသည်။
“ကျနောတို့ကိုလည်း အဲဒီမှာမီးသွေးဖိုက လူနှစ်ယောက်က ထင်းခုတ်သွားရင်းတွေ့လို့ အကြောင်းကြားလာတဲ့အတွက် တိုင်ယူးယန်က တာဝန်ရှိတဲ့သူ ၃ယောက်ရယ်၊ နောက်ပြီး ကျနော်တို့ သူငယ်ချင်း ၂ယောက်နဲ့ မီးသွေးဖိုက နှစ်ယောက်သွားကြည့်တာပါ။ ကျနော်တို့သွားကြည့်တဲ့ချိန်မှာ သေဆုံးနေတဲ့အမျိုးသမီးကတော့ ခေါင်းမရှိတော့ဘူး။ သက်ဆိုင်ရာကိုအကြောင်းကြားထားပြီဆိုတော့ကျနော်တို့လည်း အဲလိုဘဲထားထားခဲ့တယ်။” ဟု ဦးလယန်ဂွမ်ပန်ကပြောသည်။
ယင်းအမျိုးသမီးသေဆုံးနေသည့် နေရာမလှမ်းမကမ်းတွင် ၁၂၅ ဆိုင်ကယ်အစိမ်းရောင်တစ်စီးရှိနေပြီး အမျိုးသမီးသည်လည်း အသတ်ခံထားရသည်မှာ တစ်လခန့်ရှိနိုင်ပြီဖြစ်ကြောင်း ၎င်းက သုံးသပ်ပြောဆိုသည်။
အဆိုပါ ကိစ္စအား နမ်ကျင်အုပ်ချုပ်ရေးမှူးအား မေးမြန်းရာတွင် နမ်ကျင်ဒေသသည် အလွန်ကျယ်ပြန့်သည့်အတွက် မည်သည့်နေရာတွင် သေဆုံးနေကြောင်း မသိရှိရသေးသဖြင့် အတိအကျဖြေဆိုနိုင်ခြင်းမရှိသေးကြောင်း ပြောသည်။
