ပလန တွင် စစ်ကောင်စီတပ်မှ လူငယ် ၂ ဦးကို ဖမ်း မမိသဖြင့် အိမ်အလည်လာသူ ၂ ဦးကို ရိုက်နက်ဖမ်းဆီး

မြစ်ကြီးနား ပလန ရပ်ကွက် ၁ တွင် ယနေ့ မွန်းလွဲပိုင်းက စစ်ရှောင်လူငယ် ၂ ဦးကို စစ်ကောင်စီ ရဲတပ်ဖွဲ့ဝင်များ လာရောက်ဖမ်းဆီးခဲ့သော်််််လည်း ဖမ်းမမိသဖြင့် ထို လူငယ် ၂ ဦးနေထိုင်သောအိမ်တွင် ခေတ္တလာလည်သော ဧည့်သည် ၂ ဦးကို ဖမ်းဆီးရိုက်နက် ခေါ်ဆောင်သွားသည်ဟု သိရသည်။

အဆိုပါနေအိမ်တွင် လူစိမ်း ရှိနေသည်ဟု သတင်းပေးသူရှိသောကြောင့် ယနေ့ မွန်းလွဲ ၂ နာရီခန့်တွင် စစ်တပ်နှင့် ရဲများမှ လာရောက်ဖမ်းဆီးခဲ့ရာ ထိုလူငယ် ၂ ဦးမှာ လွတ်မြောက်သွားခဲ့သည်။

သို့သော်လည်း ၎င်းနေအိမ်သို့ အလည်လာသူ အမှုတော်ဆောင် ဆရာတန်ဂွမ်း နှင့် ဇနီးဖြစ်သူ မအေးအေးစိုးတို့ ဇနီးမောင်နှံ ၂ ဦးကို စစ်ကောင်စီတပ်များမှ ဖမ်းဆီးရိုက်နှက်ခေါ်ဆောင်သွားကြောင်း မိသားစုဝင်များနှင့် နီးစပ်သူတစ်ဦးက KNG ကို ယခုလိုပြောသည်။

“အခုလွတ်သွားတဲ့ လူငယ် ၂ ယောက်က PDF လည်း မဟုတ်ဘူး။ အရင် တစ်ပတ်လောက်က ရှမ်းပြည်ကနေ အဲ့ဒီ သူတို့ဆွေမျိုးအိမ်မှာ လာနေနေတဲ့ စစ်ရှောင်ကလေး ၂ ယောက်ဖြစ်တယ်။ အဲ့မှာ စစ်တပ်နဲ့ ရဲကို PDF ရှိတယ်ဆိုပြီး သတင်းပေးသူရှိတဲ့သူ ရှိလို့ထင်တယ် ဒီနေ့စစ်တပ်က သေနတ်တွေနဲ့ လာပစ်ခတ်ပြီး လာဖမ်းတဲ့ အဲ့ကလေး ၂ ယောက်က လွတ်သွားပြီ။ အဲ့မှာ ဘာမှမဆိုင်တဲ့ အိမ်ကိုအလည်လာတဲ့ ဆရာတို့လင်မယားကို ဖမ်းသွားတာ။ ဆရာကိုက မေးတာ မဖြေလို့ဆိုပြီးရိုက်နှက်တာ သွေးတွေထွက်ပြီး ကားနဲ့ဖမ်းသွားပြီ။” ဟု မျက်မြင်တွေ့ရှိသူတစ်ဦး KNG သတင်းဌာနကို ပြောသည်။

နေအိမ်သို့ ရုတ်တရက်ရောက်လာသော ရဲနှင့် စစ်သားများက ထိုစစ်ရှောင်လူငယ် ၂ ဦးကို PDF ဟုဆိုကာ သေနတ် ၁၀ ကြိမ် ထက်မနည်း လိုက်လံပစ်ခတ်ခဲ့သော်လည်း ဖမ်းမမိသောကြောင့် နီးစပ်ရာအိမ်များသို့ လိုက်လံစစ်ဆေးခဲ့ခြင်း​ ဖြစ်သည်။

စစ်တပ်မှ ဖမ်းဆီးခေါ်ဆောင်သွားသော ဆရာတန်ဂွမ်းသည် DCC အသင်းတော်မှ ခရစ်ယာန် အမှုတော်ဆောင် ဆရာတစ််််ပါး ဖြစ်ပြီး ဆွေမျိုးအိမ်သို့အလည်လာရာမှ ဖမ်းဆီးခံလိုက်ရခြင်းဖြစ်ကြောင်း သိရသည်။

မြစ်ကြီးနားမြို့တွင် စစ်ကောင်စီတပ်မှ ပြီးခဲ့သော ရက်ပိုင်းကလည်း လူငယ် ၂ ဦးကိုအကြောင်းမရှိ ဖမ်းဆီးသွားခဲ့ရာ ယခုချိန်ထိ လွတ်မြောက်လာခြင်း မရှိသေးကြောင်း သိရသည်။