ဖားကန့် ကချင်လွတ်လပ်ရေးတပ်မတော် KIA တပ်မဟာ ၉ ၊ တပ်ရင်း ၆ နယ်မြေကို စစ်ကောင်စီက ယနေ့ နံနက်ပိုင်း ဂျက်လေယာဉ်ဖြင့် ဗုံးကျဲတိုက်ခိုက်ခဲ့ရာ တပ်တွင်းနေရာအချို့ ထိခိုက်ပျက်စီးမှု ရှိခဲ့ကြောင်းသိရသည်။
မတ်လ ၁၀ ရက်နေ့ ယနေ့နက်အစောပိုင်း ၁ နာရီဝန်းကျင် စစ်ကောင်စီ၏ ဂျက်လေယာဉ် ၂ စီး ဖြင့် ၄ ကြိမ်ထက်မနည်း လာရောက် ဗုံးကျဲတိုက်ခိုက်ခဲ့သောကြောင့် KIA တပ်ရင်း ၆ တပ်စခန်း မီးဖိုးချောင်နှင့် ခန်းမဆောင်တစ်ချို့ ထိခိုက်ပျက်စီးမှုရှိခဲ့သည်ဟု KIA နှင့် နီးစပ်သော ပြည်သူတစ်ဦးက KNG ကို ပြောသည်။
“ကားထားတဲ့ အဆောင်တစ်ခု၊ ဆေးရုံအဆောင်၊ မီးဖိုဆောင် ၃ နေရာထိသွားတယ်။ ဒါတောင် လေယာဉ်လာမယ်လို့ သိထားလို့ ကြိုရှောင်ထားတဲ့အတွက် လူက အထိအခိုက် သိပ်မရှိလိုက်ဘူး” ဟု ပြောသည်။
စခန်းတချို့ ထိခိုက်ပျက်စီးမှုရှိခဲ့သည့်အပြင် လေယာဉ်ဗုံးကြောင့် KIA တပ်သား ၃ ဦးထက်မနည်း ပြင်းထန်ဒဏ်ရာ ရရှိခဲ့ကြောင်း သူကဆက်ဆိုသည်။
လက်ရှိ ဗုံးကျဲတိုက်ခိုက်ခံရသည့် KIA တပ်ရင်း ၆ နေရာသည် ၂၀၂၂ ခုနှစ် နှစ်ကုန်ပိုင်းမှသာ စခန်းနေရာအသစ် ရွေ့ပြောင်းထားသော နေရာတစ်ခုဖြစ်ပြီး ယခု ပထမဆုံးအကြိမ် လေယာဉ်ဖြင့် ဗုံးကျဲ တိုက်ခိုက်ခဲ့ခြင်း ဖြစ်သည်။
ယခင် KIA တပ်ရင်း ၆ စခန်းနေရာသည် ဖားကန့်မြို့နယ် ကံဆီးကျေးရွာဘက်တွင် တည်ရှိခဲ့သော်လည်း ပြီးခဲ့သော အောက်တိုဘာလ ၂၃ ရက်နေ့ အနန့်ပါ (A Nang Pa) ဗုံးကျဲ တိုက်ခိုက်ခံခဲ့ရသည့်အတွက် နေရာရွှေ့ပြောင်းခဲ့ခြင်း ဖြစ်သည်။
စစ်ကောင်စီတပ်သည် ယခုနှစ် ၂၀၂၃ တွင် ဖားကန့်ဒေသ KIA တပ်မဟာ ၉ နယ်၊ တပ်ရင်း ၂၆ နှင့် တပ်ရင်း ၆ နေရာတို့လာတွင် လာရောက်ဗုံးကျဲတိုက်ခိုက်ခဲ့သည့် အကြိမ်ရေ ၆ ကြိမ်ထက်မနည်းရှိလာပြီဟု သတင်းအရင်းအမြစ်များက ပြောသည်။
ယခုလို စစ်ကောင်စီဘက်မှ ဖားကန့်ဒေသဘက်သို့ လာရောက်ဗုံးကျဲတိုက်ခိုက်ခြင်းနေသည် ဆယ်ဇင်းဒေသ တပ်ရင်း ၂၆ နယ်မြေတို့တွင် KIA ဘက်မှ စစ်ကောင်စီတပ်စခန်းများကို မကြာခဏ သွားရောက်တိုက်ခိုက်မှုများရှိနေသလို တစ်ဖက်မှာ ဖားကန့်ဒေသကို စစ်ကောင်စီက ထိန်းချုပ်ရန် ကြိုးစားလုပ်ဆောင်နေခြင်းဖြစ်သည်ဟု သိရသည်။
