စစ်ကိုင်း – ကချင်အစပ် ဗန်းမောက်မြို့နယ်ထဲက ရှမ်းနီအမျိုးသားတပ်မတော် SNA နဲ့ စစ်ကောင်စီတပ်ဖွဲ့ တွေ အထိုင်ချတပ်စွဲထားတဲ့တပ်စခန်းတစ်ခုကို ကာကွယ်ရေးတပ်ဖွဲ့တွေဘက်ကသိမ်းပိုက်ရရှိခဲ့တယ်လို့ ကောလင်းခရိုင်ပြည်သူ့အုပ်ချုပ်ရေးအဖွဲ့ဆီက သိရပါတယ်။
ဗန်းမောက်မြို့နယ် နဲ့ ပင်လည်ဘူးမြို့နယ်အစပ်မှာရှိတဲ့ အဲ့ဒီတပ်စခန်းကို ပြီးခဲ့တဲ့ ဒီဇင်ဘာပထမအပတ်ကပဲ ဒေသကာကွယ်ရေးတပ်ဖွဲ့တွေ နဲ့ ပြည်သူ့ကာကွယ်ရေးတပ်ဖွဲ့ ပကဖ တွေပူးပေါင်းပြီးတိုက်ခိုက်သိမ်းပိုက်ခဲ့တာလို့ ဆိုပါတယ်။
“ဗန်းမောက်နယ်ထဲကပေါ့ ရှမ်းနီ SNA တွေရွာမှာဝင်ပြီးတပ်စွဲထားတာကို ဒေသခံကာကွယ်ရေးအဖွဲ့တွေ နဲ့ ပကဖ တွေပေါင်းပြီးတိုက်ခိုက်ခဲ့တယ်လို့ သိရပါတယ် သူတို့ခြေကုပ်ယူထားတဲ့စခန်းတစ်ခုကိုသိမ်းပိုက်နိုင် ခဲ့တာလို့သိရပါတယ်”လို့ ကောလင်းခရိုင်ပြည်သူ့အုပ်ချုပ်ရေးအဖွဲ့ကတာဝန်ရှိသူတစ်ယောက်ကပြောပါတယ်။
ဒါ့အပြင် အဲ့ဒီတိုက်ပွဲအတွင်း တိုက်ပွဲပြင်းထန်စွာဖြစ်ခဲ့တာမရှိပဲ တိုက်ခိုက်သိမ်းပိုက်နိုင်ခဲ့တာဖြစ်ပြီး တိုက်ပွဲအတွင်း အခြေနေအသေးစိတ်ကိုတော့မသိရသေးဘူးလို့ သိရပါတယ်။
အဲ့ဒီတပ်စခန်းဟာ ပြီးခဲ့တဲ့ ၄ လဝန်းကျင်လောက်ကတည်းက ပင်ဟင်းခါးရွာကိုစစ်ကြောင်းထိုးလာရာမှ အထိုင်ချတပ်စွဲထားတဲ့စခန်းဖြစ်တယ်လို့ ဆိုပါတယ်။
“အဲ့ဒီစခန်းက လွန်ခဲ့တဲ့ ၄ လလောက်ကတည်းက SNA နဲ့ စကစ စစ်ကြောင်းတွေဝင်လာလို့ ဒေသခံတွေ လည်းထွက်ပြေးခဲ့ရတယ် ပင်ဟင်းခါးကဒေသခံတွေပေါ့ အဲ့တာကို ပြန်ပြီးသိမ်းပိုက်နိုင်ခဲ့တာပေါ့လေ”လို့ ကောလင်းခရိုင်ပြည်သူ့အုပ်ချုပ်ရေးအဖွဲ့က တာဝန်ရှိသူတစ်ယောက်ကပြောပါတယ်။
တစ်ဖက်မှာတော့ အဲ့ဒီစခန်းဟာပင်လည်ဘူး နဲ့ ဟုမ္မလင်းမြို့ကိုသွားတဲ့ လမ်းမကြီးမှာတည်ရှိတဲ့တပ်စခန်းဖြစ်ပြီး အရေးပါတဲ့တပ်စခန်းတစ်ခုဖြစ်တယ်လို့ ဆိုပါတယ်။
အဲ့ဒီ ပင်ဟင်းခါးကျေးရွာဟာ ရှမ်းနီလူမျိုးအများစုနေထိုင်တဲ့ အိမ်ခြေ ၁၀၀ နီးပါးသာ ရှိတဲ့ရွာဖြစ်ပြီး ပင်လည်ဘူး နဲ့ ဗန်းမောက်မြို့နယ် အကြားမှာတည်ရှိတာလို့ သိရပါတယ်။
ဒါ့အပြင် ပြီးခဲ့တဲ့ နိုဝင်ဘာ ၁၁ ရက်နေ့ကလည်း ဗန်းမောက်မြို့နယ် မြစ်သေးချင်းရွာနားမှာ စစ်ကောင်စီတပ် နဲ့ ကာကွယ်ရေးတပ်တွေအကြား တိုက်ပွဲဖြစ်ပွားခဲ့ပြီး အဲ့ဒီတိုက်ပွဲမှာ စစ်ကောင်စီတပ်ဘက်က အရာရှိ ၂ ယောက် အပါအဝင် စစ်ကောင်စီတပ်သား ၈ ယောက်ထက်မနည်းသေဆုံးခဲ့တယ်လို့ Banmauk Revolution BR က သတင်းထုတ်ပြန်ခဲ့ပါတယ်။
By – အမိုး
