စစ်ကိုင်းနဲ့ကချင်အစပ် ပင်လည်ဘူးမြို့ပေါ်မှာ စစ်ကောင်စီတပ်နဲ့ ကာကွယ်ရေးပူးပေါင်းတပ်တွေအကြား တိုက်ပွဲပြင်းထန်နေပြီး စစ်ကောင်စီတပ်ဘက်ကလည်း လေကြောင်းကနေဆက်တိုက် ဗုံးကြဲတိုက်ခိုက်တာတွေလုပ်နေတယ်လို့ ကောလင်းခရိုင်ပြည်သူ့အုပ်ချုပ်ရေးအဖွဲ့ဆီက သိရပါတယ်။
ဖေဖော်ဝါရီလ ၂၁ ရက်နေ့ မနက်ပိုင်း ၄ နာရီဝန်းကျင်လောက်ကနေစလို့ ပင်လည်ဘူးမြို့ပေါ်တပ်စွဲထား တဲ့ စစ်ကောင်စီတပ်တွေကို ကာကွယ်ရေးပူးပေါင်းတပ်တွေကတိုက်ခိုက်ရာကနေ တိုက်ပွဲတွေပြင်းထန်နေတာလို့ ပြောပါတယ်။
“မနေ့က မနက်အစောကတည်းကစဖြစ်နေတာပါ မနေ့ကတော့ လေယာဥ်နဲ့ ဂျက်တွေရောပေါ့ လာပစ်သွားတယ် တိုက်ပွဲကလည်း မြို့ပေါ်မှာပဲဖြစ်နေတာပါ လေကြောင်းက မနေ့ကတည်းက ရော ဒီနေ့မနက်ရောတိုက်ခိုက်နေတယ်” လို့ကောလင်းခရိုင်ပြည်သူ့အုပ်ချုပ်ရေးအဖွဲ့ကတာဝန်ရှိသူတစ်ယောက်ကပြောပါတယ်။
စစ်ကောင်စီတပ်ဟာ မနေ့ကတစ်ရက်တည်း လေကြောင်းအသုံးပြုပြီး ၇ ကြိမ်တိုင်တိုင် ဗုံးကြဲ တိုက်ခိုက်ခဲ့ပြီးတော့ ဒီကနေ့လည်း မနက်ပိုင်း ၁၀ နာရီအထိကို လေကြောင်းအသုံးပြု တိုက်ခိုက် တာ ၄ ကြိမ်လောက်ရှိပြီလို့ ဒေသခံတွေကပြောပါတယ်။
တိုက်ပွဲကတော့ စစ်ကောင်စီတပ်တွေတပ်စွဲထားတဲ့ ရဲစခန်းအပါအဝင် စာသင်ကျောင်းနဲ့ရိပ်သာတွေ အနီးတစ်ဝှိုက်တိုက်ပွဲပြင်းထန်နေတာဖြစ်ပြီး အရပ်သားတွေကတော့ မြို့တွင်းထဲမှာမရှိတော့ဘူးလို့ ကောလင်းခရိုင်ပြည်သူ့အုပ်ချုပ်ရေးအဖွဲ့က တာဝန်ရှိသူတစ်ယောက်ကပြောပါတယ်။
“အခုတိုက်ပွဲဖြစ်နေတဲ့နေရာမှာတော့ ပြည်သူတွေမရှိတော့ပါဘူး၊ စကစနဲ့ ကာကွယ်ရေးတပ်ရင်း တပ်ဖွဲ့တွေပဲရှိပါတယ် ထိခိုက်မှုကတော့ ကြီးကြီးမားမားမကြားသေးပါဘူး ကျနော်တို့လည်းမြို့ထဲ ကို ဝင်လို့ရတဲ့အနေအထားမဟုတ်တော့ ဘယ်လောက်ထိခိုက်တယ်ဆိုတာမမြင်ရသေးပါဘူး”လို့ပြောပါတယ်။
စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် မြို့တွင်းနေအိမ်တချို့ပျက်ဆီးတယ်လို့ ပင်လည်ဘူးမြို့နယ်က ဒေသခံတွေက ဖေ့ဘုတ်စ်ကတဆင့်ရေးသားထားတာတွေတွေ့ရပေမဲ့ မြေပြင်အခြေနေကိုတော့ KNG ကအတည်မပြုနိုင်သေးပါဘူး။
ပင်လည်ဘူးမြို့နယ်မှာတော့ စစ်ကောင်စီလက်အောက်ခံ တပ်ရင်း ခမရ ၃၆၆ နဲ့ ခမရ ၃၇၀ တို့ တပ်စွဲထားကြတယ်လို့ ဒေသခံတွေဆီကသိရပါတယ်။
မြန်မာနိုင်ငံတစ်ဝှမ်းမှာတော့ အာဏာသိမ်းပြီးတဲ့နောက်ပိုင်း စစ်ရေးပဋိပက္ခတွေကြောင့် စစ်ဘေး ရှောင် အရပ်သား ၂ ဒဿမ ၆ သန်းကျော်ရှိလာဖြစ်တယ်လို ကုလသမဂ္ဂ လူသားချင်းစာနာမှု ဆိုင်ရာပေါင်းစပ်ညှိနှိုင်းရေးရုံး (UN OCHA) ရဲ့ စာရင်းတွေအရသိရပါတယ်။
By – အမိုး
