ရှမ်းပြည်မြောက်ပိုင်း လားရှိုးမြို့ စစ်ကောင်စီတပ် ခမရ ၅၀၇ နှင့် အမှတ်( ၂ ) ရဲစခန်း ၂ နေရာ ယနေ့ နံနက်ပိုင်း ၄ နာရီဝန်းကျင် ပစ်ခတ်တိုက်ခိုက်ခံရကြောင်း ဒေသခံများထံမှသိရသည်။
လားရှိုးမြို့ရပ်ကွက်(၅)အထက်မန်အိုင်၊ အကုန်းညောင်တဝိုက်တွင်ရှိသော စစ်ကောင်စီ တပ်စခန်း ၂ ခုကို လက်နက်ကိုင်တောင်လှန်ရေးတပ်ဖွဲ့ဘက်မှ လာရောက်ပစ်ခတ်ခဲ့ပြီး ၁၅ မိနစ်ခန်အကြာ ပြန်အလှန်တိုက်ခိုက်မှု ဖြစ်ပွားခဲ့သည်ဟု လားရှိုးမြို့နေ ဒေသခံတစ်ဦးက KNG ကိုပြောသည်။
“လက်နက်ကြီးသံ အရင်စကြားရတယ်။ ဟိုဘက်က လက်နက်ကြီးနဲ့ အရင်လာပစ်ပုံပဲ အဲ့တာပြီးမှ လက်နက်ငယ်တွေ ဆက်တိုက်ပစ်တော့တာ။ လက်နက်ကိုင်တပ်ဖွဲ့များတော့ ဘယ်သူတွေလာပစ်တယ်ဆိုတာတော့ အတိအကျမသိဘူး။ အားလုံးတော့ထိတ်လန့်သွားကြတာ။ ဘေးပတ်ဝန်းကျင် အိမ်တွေမှာ လက်နက်ခွံတွေ လက်နက်စတွေ လာကျတာတော့ရှိတယ်” ဟု၎င်းကပြောသည်။
အဆိုပါပစ်ခတ်တိုက်ခိုက်မှုသည် မြောက်ပိုင်းမဟာမိတ်ညီနောင် ၃ ဖွဲ့မှ လာရောက်ပစ်ခတ်ခြင်းဖြစ်သည်ဟု ဒေသခံများပြောဆိုနေကြသော်လည်း KNG အနေဖြင့် အတည်ပြုနိုင်ခြင်းမရှိသေးပါ။
ထို ပစ်ခတ်ခံရမှုတွင် စစ်ကောင်စီတပ်စခန်း အနီးပတ်ဝန်းကျင်ရှိ ပြည်သူနေအိမ်တချို့ ၌ လက်နက်ခွံများ လက်နက်စများ ကျရောက်မှုရှိပြီး ပြည်သူများထိခိုက်မှုတစုံတရာမရှိိိိိိိိိိိခဲ့ကြောင်း သိရသည်။
လက်ရှိ လားရှိုးမြို့အတွင်း စစ်ကောင်စီလုံခြုံရေးများချထားပြီး ညီနောင်မဟာမိတ် လက်နက်ကိုင်တော်လှန်ရေးတပ်ဖွဲ့များဘက်လည်း အနီးပတ်ဝန်းကျင်တလျှောက်တွင် စစ်ရေးလှုပ်ရှားလျက်ရှိကြောင်းသိရသည်။
ပြီးခဲ့သည့် ဇွန်လဆန်းမှ လားရှိုးမြို့နယ်အတွင်း စစ်ကောင်စီတပ်နှင့် ကိုးကန့် MNDAA ကြား စစ်ရေးတင်းမာနေပြီး တိုက်ပွဲမကြာခဏ ဖြစ်ပွားလေ့ရှိနေကြောင်း ဒေသခံများပြောသည်။
