စစ်ကိုင်းတိုင်းဒေသကြီး ထီးချိုင့်မြို့နယ် ဇီးကုန်းကျေးရွာဘက်မှာ ဩဂုတ်လ ၂၀ရက်နေ့က ကချင်လွတ်လပ်ရေးတပ်မတော် KIA၊ ထီးချိုင့်PDF ပူးပေါင်းတပ် နှင့် စစ်ကောင်စီတပ်တို့ကြား ဖြစ်ပွားခဲ့တဲ့တိုက်ပွဲအတွင်း စစ်ကောင်စီတပ်ဘက် ၃ ဦးသေဆုံးခဲ့ပြီး လက်နက်ခဲယမ်းတစ်ချိူ့ကိုလည်း ကာကွယ်ရေးတပ်ဘက်ကသိမ်းဆည်းရမိခဲ့တယ်လို့ ထီးချိုင့်ပြည်သူ့ကာကွယ်ရေးတပ်ကနေ သိရပါတယ်။
သြဂုတ်လ ၂၀ ရက်နေ့ မနက်ပိုင်းမှာ ဇီးကုန်းကနေ ကွင်းကြီးဘက်ကို စစ်ကြောင်းထိုးလာတဲ့ အင်အား ၈၀ ကျော်ပါတဲ့စစ်ကောင်စီ စစ်ကြောင်းကို ကချင်လွတ်လပ်ရေးတပ်မတော် KIA နှင့်ထီးချိုင့်ပြည်သူ့ကာကွယ်ရေးတပ်တွေပူးပေါင်းပြီး ဇီးကုန်းနဲ့ ကွင်းကြီးကြား အရောက်မှာ ပိတ်ဆို့ကြားဖြတ်တိုက်ခိုက်ခဲ့တာကြောင့် နှစ်ဖက်တိုက်ပွဲပြင်းထန်ခဲ့တယ်လို့ ထီးချိုင့်PDF တာဝန်ရှိသူတစ်ဦးက KNG ကိုပြောပါတယ်။
“တိုက်ပွဲက မနက် ၈ နာရီ ၄၅ လောက်ကနေ ညနေ ၆နာရီထိဖြစ်တယ်။ ဇီးကုန်းကနေ ကွင်းကြီးဘက်ကွေ့လာတဲ့ချိန်မှာကိုယ့်ဘက်က စောင့်ကြိုတိုက်ခိုက်ခဲ့တာပေါ့ အကျအဆုံးကတော့လောလောဆယ်အလောင်းသုံးလောက်ရထားတယ် ခြင်းကြား ၁၀ လုံးရထားတယ်။ သေနတ်က ၂လက်ရတယ်”လို့ သူကပြောပါတယ်။
တိုက်ပွဲဟာ ဇီးကုန်းရွာနဲ့ကွင်းကြီးရွာကြားထဲက တောတစ်နေရာမှာဖြစ်ပွားခဲ့တာဖြစ်ပြီး မနက် ၈နာရီဖြစ်ပွားခဲ့ပြီး ညနေ ၅ နာရီလောက်မှာတော့ မြစ်ကြီးနားကနေ ဆင်းလာတဲ့ဂျက်ဖိုက်တာ ၄ စီးနဲ့ ဗုံးကြဲတိုက်ခိုက်သွာတာဖြစ်တယ်လို့ သိရပါတယ်။
“ဇီးကုန်းနဲ့ကွင်းကြီးကြားလေးမှာပဲ ဖြစ်တာတိုက်ပွဲက ဟိုနေရာရွေ့ဒီနေရာရွေ့တော့ဖြစ်တာပေါ့ သူတို့ဘက်အထိနာတော့ မနက် ၁၁ နာရီမှာ တစ်ကြိမ် ည နေပိုင်းမှာတော့ ၂ နာရီ၂၂ မိနစ်မှာတကြိမ် ၂ နာရီ ၁၅မိနစ်မှာတစ်ကြိမ်လာကျဲသွားတယ်”လို့ ထီးချိုင့် PDFတာဝန်ရှိသူတစ်ဦးကဆက်ပြောပါတယ်။
စစ်ကောင်စီက ဂျက်ဖိုက်တာ ၄ စီးနဲ့ လာရောက်ဗုံးကျဲတိုက်ခိုက်မှုမှာ တစ်ကြိမ်မှာတင် ၂ စီးနှုန်းနဲ့ လာရောက်ဗုံးကျဲသွားပြီး ပေါင် ၅၀၀ နှင့် ပေါင် ၁၀၀၀ ဗုံးသီးလုံးတွေ အများဆုံး အသုံးပြုသွားတယ်လို့သိရပါတယ်။
လေကြောင်းတိုက်ခိုက်ခံရတဲ့ နေရာဟာ ဇီးကုန်းနဲ့ ကွင်းကြီးကြားက တိုက်ပွဲဖြစ်တဲ့အနီးတစ်ဝိုက်ကို မှာသာကျဲသွားတာကြောင့် အရပ်သားထိခိုက်မှုတော့မရှိဘူးလို့ ဒေသခံတွေကဆိုပါတယ် ။
ကွင်းကြီးဘက်ဝင်ဖို့ စစ်ကြောင်းထိုးလာတဲအဲ့စီစစ်ကြောင်းဟာ KIA ၊ PDF ကြားဖြတ်တိုက်ခိုက်ခဲ့တာကြောင့် ယမန်နေ့ ညပိုင်းကတည်းကပဲ ဇီးကုန်းဘက်ကို ပြန်လည်တပ်ဆုတ်သွားတယ်လို့သိရပါတယ်။
